【親子好去處】$38包睇戲+室內遊樂場+兒童圖書館不足一米免費入場睇新片

By 龍鳯孖媽 on 11 Mar 2021

畢業於科大生化系碩士和教大教育文憑，曾於小學任教數學、常識、體育和音樂科十三年。現放棄教師工作，變身成全職媽媽兼任 Miss SwanSwan，教養一對龍鳳寶寶。Facebook:https://www.facebook.com/Miss.swanswan/

上年9月，孖媽諗住趁孖寶未夠一米高可以免費入戲院睇戲，叫隊友買票。點知隊友左耳入右耳出，買足4張票！我都唔知好嬲定好笑，諗住就嚟無得用優惠嘅最後一擊。不過算吧！當坐得舒服啲，而早場都只係38元一張票，唔算貴。今次再帶孖寶睇電影，更可玩埋playroom和兒童圖書館。

上次已經想介紹間戲院，但因唔小心delete哂啲相，今次再去又可以詳細介紹吓！
今次門口仲增設咗救援小英雄栢利Poli和Amber電動車，小朋友勁開心。

收費以代幣形式計算，10元2個代幣，坐Poli要3個代幣(15元一局)，至於Amber要4個(20元一局)。其實之前我哋係青衣玩過，只係6元一局。所以我哋冇玩到。

直接入戲院，更多免費玩法，我始終係一個慳家媽媽，介紹嘅地方多數唔使錢或收費便宜。

喺House 4 附近有一個小型playroom，有滑梯、小型車仔、路軌汽車等。路軌汽車超好玩，小朋友不斷玩唔停。

House 5 隔離仲有個小型兒童圖書館。

入場前，其實都知套戲係俾大人睇，唔係俾小朋友睇。

今次小朋友嘅享受程度真係無上次多啦A夢反應咁好，但意外地小朋友竟然明白交換靈魂嘅橋段對。小朋友來說，套戲可能只係一部卡通片。但對大人來說，是一套令人反思，有深度嘅電影!!

少少劇透：

主角阿祖係一名熱愛爵士樂嘅黑人，一直希望係表演台上發光發亮，然而懷才不遇，只能做一名教師。直至有一日，得到難能可貴嘅演出機會，但因為意外，徘徊生死之間。阿祖唔想就咁死咗，於是努力諗辦法返回地球。在「投胎先修班」遇上唔想投胎嘅靈魂22號。22號一直搵唔到「火花」，所以一直投唔到胎。他們一齊展開冒險旅程就係故事嘅開始。

阿祖初時咁想死而復生，係因為佢有心願未了，想成為出色的表演家。靈魂22號令阿祖明白到「人生的火花」不在於一定要成為好出色的名人。原來「火花」，即是人生的意義原來在於有沒有珍惜每一天，懂得感恩，感謝每天不同的經歷或遭遇，那怕只是一片樹葉，徹徹底底地感受活著多好。說真的，地球上有多少個貝多芬、愛因斯坦呢？努力活好每一日就係我們的「火花」吧！

阿祖媽媽不贊成阿祖追夢，認為應該賺錢為生活。令身為父母的我們反思，生活固然迫人，但理想是否可以放棄呢??髮型屋裹的人和事又是另一體會。髮型師本來想做獸醫，但因一些原因未能如願，最後成為髮型師，每天為客人理髮，也樂在其中。做人最緊要開心，即使預期未必似最初。店內其中一位客人成日笑阿祖沒出色，就活像身邊總有些人以取笑別人、踩低別人抬高自己為樂。其實這種人先最可悲，對他們來講，生存的意義就係以說話傷人。