【小一放榜】印象分好重要！叩門信3大必寫重點

今年小一統一派位結果將於6月1日公布。「大抽獎」後，如果未能獲派心儀小學，家長惟有出動「叩門」最後一擊。不過，想喺眾多學生中脫穎而出，家長就要做足準備功夫，一封有誠意嘅叩門信，更加係必不可少。

雖然網上有林林總總嘅叩門信範本，不過家長只宜作參考之用，切忌抄襲。由於每間學校嘅收生準則、校風、辦學理念都唔一樣，家長應先了解清楚再「出擊」。另外，寫叩門信時，亦需留意以下3點。

1. 誠意

喺叩門階段，有唔少學校都只接受「1-1-1」或「1-1」，家長最好喺叩門信開頭表明以該校為「1-1-1」或「1-1」，以表誠意，增加印象分。若果唔係「1-1-1」或「1-1」，家長亦應解釋原因，例如：自行分配分數不足，所以未有揀選、居住地方唔係學校所屬校網等。

2. 突出孩子長處

家長喺叩門信內可簡單介紹小朋友的優點或專長，由於大部分學校都傾向取錄發展全面嘅學生，所以若果喺語文、才藝、運動上都有好表現嘅小朋友，更加要喺信中提及，能附上證書、比賽獎狀作證明更好。

Photo from MamiDaily

3. 舉出學校優勢

家長喺寫叩門信，要先了解清楚學校嘅背景資料，同時喺信中表示認同及欣賞學校嘅理念、教學方法，例如：著重學童品德、重視語文學習等。

Photo from MamiDaily

Text：Mami Editorial