【流感不斷醞釀 唔少BB都中招】

上個月聖誕節，BB界嘅流感其實好似已經不斷醞釀，薯蛋B都中招，反覆不斷發燒，真係嚇死全家，好在精神一直都幾好。

但唔知係唔係啲菌嚴重咗，定BB係咁？食左藥會退燒，但藥嘅效力過咗後又會燒返，嗰陣因為撞正做節，跟住又聖誕節，好多診所唔係早收就無開，薯蛋睇開嗰間就係無開，好采有打針嘅藥做「事啤」。

接住到今個月，睇新聞見到好多幼稚園都大爆發流感，而且好多BB都病咗，整合咗小小資料畀大家知（來源衛生署）：

單係過去星期日同星期一，就有44間幼稚園或幼兒中心、9間小學同2間中學爆發流感樣疾病個案；喺1月6日至1月14日嘅9日之間，達131間幼稚園或幼兒中心爆發流感樣疾病。而且有新聞話嚴重流感個案已經破百。

因為自己BB仲細，平時見新聞話係大人爆發流感都無咩留意，但前幾日去一去衛生署個網睇返，原來好多個案係BB出事，好多都係一直健康良好，但唔小心感染流感，開始發燒同咳，之後就嘔同四肢出疹，唔少個案仲搞到腦膜炎或肺炎！真係唔可以忽視BB病咗嘅事！！！！！！！！

見教育局只係不斷提醒大家要注意衛生，但其實BB又點會識，叫佢哋戴口罩，戴咗3秒都除咗。教育局好多時都係見間幼稚園真係爆流感先會停課，其實係唔係太遲呢？但我都知如果BB一停課，返工嘅媽媽就麻煩，因為要揾人湊，但係我自己覺得BB健康最重要，話晒就快新年，一陣病咗就好大獲！諗緊會唔會自己自行停課，因為薯蛋只係返K1班，所以影響係唔大嘅，不過金錢損失唔計得太多，病咗仲大獲！唔知其他媽媽會點呢？

Text：薯蛋媽媽

Photos：Shutterstock