懷孕後開心又不安 孕媽媽嘅3個憂慮

好多孕媽媽得知自己懷有小寶寶嘅一刻，總會歡天喜地，滿心期待小寶寶出世！但隨著預產期迫緊，孕媽媽開始有不安嘅感覺，仲會胡思亂想，擔心會出現下面3件事：

1. 無法做到一個好媽媽

自己唔算好鍾意小朋友，但又未至於去到討厭嘅程度。一向唔係好識得同小朋友相處嘅自己，究竟可唔可以成為一個好媽媽？好多孕媽媽都會懷疑自己嘅能力、對自己冇信心，擔心自己會同BB相處得唔好，甚至冇辦法照顧好BB，隨著離BB出世嘅日子愈近，孕媽媽就愈焦慮，害怕成為媽媽。其實冇一個女人天生就識得做媽媽，所有媽媽都係邊學邊做，同BB一齊成長，所以唔需要擔心自己無法勝任媽媽嘅角色。

2.身材走樣

每個媽媽都會經歷到懷孕令身體變化嘅一切，如體態改變、妊娠紋、乳房脹大⋯⋯媽媽可以將呢啲身體變化視為人生美好嘅經驗，好好享受自己短暫嘅形象改變！生完BB後可進行適當運動恢復體型，至於妊娠紋雖然難以去除，但亦可以調整自己嘅心態，將呢啲小印記視為自豪嘅人生紀錄。

3.同社會脫節

當孕媽媽開始放產假，就要暫時脫離本來非常熟悉嘅工作環境同人事關係，然後盡量留喺屋企專心養胎。雖然冇咗工作壓力，但喺百無聊賴嘅待產生活中，睇到同事朋友圈中嘅對話，會覺得自己無法參與，變成局外人。即使生完BB，亦要百分百投入坐月同照顧BB嘅生活中，根本冇時間關心外界嘅一切，會令孕媽媽覺得自己好似與世隔絕一樣。其實呢段脫節時間只係暫時性，如孕媽媽感到孤獨，亦可當係同小寶寶嘅二人相處時間，多多同小寶寶傾計，進行胎教，加深同寶寶嘅聯繫。

Text: Mami Editorial