【幼兒健康小食 蒸夠健康煎夠惹味 6個簡易步驟製BB版迷你蔗蝦】

今次整左 “BB版迷你蔗蝦”！

其實呢個版本有少少變奏，

去迎合阿囡嘅歲數，

最初真係想用蔗嫁，

不過我想比佢拎住食係食到落肚，

最後我用左鮮淮山代替。

淮山健脾益胃，

好適合煲粥仔比BB食，

但除左煲粥，

不如試下釀舊蝦滑喺中間啦！

由於佢比薯仔硬D，拎起身唔會散，

但又粉又易咬，釀埋蝦滑就無咁潺易拎D，

口味仲比起淨食淮山豐富好多。

舊蝦滑，我唔係用哂全蝦做嘅，

而係加左D豬肉碎同粟米，

未食得蝦嘅BB用全豬肉來做一樣好食，

蒸完食得，又或蒸完再略煎也可！

<<幼兒健康小食: BB版迷你蔗蝦>>

材料：

鮮淮山一小枝

中蝦仁6隻（我用急凍的）

免治豬肉一湯匙

粟米粒少許

粟粉一茶匙

做法：

先帶好手套以免直接接觸淮山皮，

否則皮膚會痕癢，然後把鮮淮山去皮，

切條，大約與BB的手指粗度差不多便可。

用少許鹽水浸住淮山條以免變色。

把已去腸蝦仁，豬肉及粟米粒一起blend成蓉。

準備做蝦膠，先加入粟粉混合。

在大碗中順時針攪拌蝦滑10次，

然後再“畢起”整舊蝦滑再撻回碗中，

來回數十次，目的迫走中間空氣，令蝦滑結實。

釀蝦滑，淮山條可先過水沖走鹽水，

吸乾，運用保鮮紙包裹可按得較實，

同時又可避免淮山的黏滑，會容易包好多。

確保整舊蝦滑沒有裂縫便可。

隔水蒸，水滾後中大火蒸8分鐘，再轉細中火蒸2分鐘。

蒸完後的迷你蔗蝦便可給BB拎住食。

喜歡的也可像我一樣，

在平底鑊中加些許油略煎，

因為Bella太喜歡食香口食物了！

送比大家《迷你BB蔗蝦》，

希望各位BB喜歡，

下次再做特色BB料理，

記得留意我地facebook更新喇！

************************************************************************

Text & Photos : 許許

【誠徵Bloggers！】想分享你的懷孕及育兒日常？請將投稿連同約40字個人簡介和近照一張，電郵到： [email protected]，我們會幫你開設個人專欄，文章經編輯部潤飾後更有機會刊登在FB專頁，快點踴躍投稿吧！