【BB夠歲數可以參加Playgroup 話你知點樣揀係最適合】


自從Jasmine識行開始，已經上咗幾堂唔同既playgroup，個人有少少心得分享，可以俾大家做個參考。

個人認為如果係第一次上playgroup，因為完全冇比較，所以好多時都會覺得各方面都好好。不過當上多幾堂唔同既堂，就會有所比較，會睇到唔同playgroup既優點及缺點。

1. 唔同老師既教學方法同模式都會好唔同，有d好著重禮儀，上堂會點名，亦都會教小朋友等待，排隊。有d完全相反，全程由得小朋友自己探索，完全free play，比較西化。

2. 另外我覺得環境都好重要，要睇下課室夠唔夠大，安唔安全。比如每班最多6個小朋友，大家要想像埋如果6位小朋友既2位家長都一齊上堂，咁未計老師都有18人，課室有冇足夠空間俾大家走動呢？放高既物件會唔會好容易俾小朋友掂到，隻手掂一掂都會跌落黎？

3. 課程內容：廣東話/英文？由於Jasmine頭兩堂都係上英文playgroup，之後上廣東話就好似唔識聽咁，要由頭開始，不過個人覺得中文及英文playgroup都各有好處，因為就算到幼稚園都會中英文上堂，早d俾小朋友實習唔同既語言環境可以早啲適應。

多數課程都離不開唱歌，跳舞，畫畫，大小肌肉訓練，有d會有messy play。上過有d係會有檯椅俾小朋友坐喺度畫及messy play，有d就會坐地下玩。

4. 課程程序都會係我考慮既因素，例如今次上堂一黎就messy play玩顏料畫畫，之後唱歌，玩shake shake跳舞，又再messy play玩+食。一開始就已經玩得好污糟，玩完幫佢抹乾淨之後，最尾又messy play，呢一點我唔係好明，點解兩個messy play唔可以放埋一齊，同埋唔係應該玩左食得既先呢？

5. 節奏：有d課堂會因為想俾你試下佢地playgroup有幾多元化，所以會一堂有好多內容，感覺好似雞精班咁。

有一間整體我都覺得係幾好，但係因為節奏太快，感覺每一個環節一上手就已經玩完。後來先知原來試堂先係咁，真正上堂會唔同，所以呢一個都要問清楚啊！

6. 時間：要考慮上堂時間會唔會係小朋友要瞓覺嘅時間，因為如果上堂時好眼瞓，會完完全全影響小朋友既投入度架！

總括而言，我個人認為如果想上既playgroup有得試堂，不妨可以試試甚至試多幾間，睇吓邊間適合自己嘅小朋友啊！

＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝

Text & Photos : Jasmine & Mama

【誠徵Bloggers！】想分享你的懷孕及育兒日常？請將投稿連同約40字個人簡介和近照一張，電郵到： [email protected]，我們會幫你開設個人專欄，文章經編輯部潤飾後更有機會刊登在FB專頁，快點踴躍投稿吧！