【 親子悠閑好去處 】 紅葉美景~青衣公園

弟弟實在太小機會曬太陽，所以趁爸爸放假一齊帶兩兄弟去公園行下，我們今次去了青衣公園，諗住順便睇下紅葉，因為公園內的人工湖旁種了好多落羽松，每年1月左右就會開始轉紅，我哋今次去到未完全轉色，遲多少少嚟一定會更靚！

雖然未有太多紅葉，但有一大遍黃色的園景一樣好靚呀！金黃色的樹木下有兩個人工湖，湖上仲有幾隻白鷺，Aidan話好開心見到白鷺，佢仲睇左好耐，一見到隻白鷺飛起就勁興奮。

青衣公園仲有個小瀑布，加上我地4點幾去的時候太陽光線射落湖水度好靚，都幾有童話般的感覺，影相一流呀！

行入d仲見到好多大紅花係小斜坡上，遠距離打卡都幾靚架。

青衣公園雖然唔算大，但都有野餐區，俾小朋友放下電，跑下都唔錯。

兒童遊樂場而家暫停開放，但見到都幾大，好啱小朋友玩。

公園內有間餐廳，肚餓都可以買野食。

簡簡單單行下公園真係好舒服，小朋友又開心，弟弟仲可以晒下太陽，好滿足！

行完青衣公園仲可以去埋青衣城行下街，過條天橋就到，好方便！

交通：青衣地鐵站B出口出，穿過青衣城步行10分鐘就可到達。

***欣賞紅葉的人都算多，大家一定要帶好口罩，保持適當的社交隔離呀！

Text & Photos : 安妮媽媽親子日記