【湯水分享】提高免疫能力 蟲草花螺片雞腳湯

天氣開始涼涼地，又令我開始想飲下雞湯(唔知點解總係覺得雞湯係要凍凍哋先好飲...呵呵)，加上之前喺大澳買咗包螺片都未用，所以就決定加埋蟲草花一齊煲，嚟一個可以提高免疫力嘅湯水，趁冇病冇痛時打好個底，咁轉天氣都唔怕啦~

蟲草花性質平和，不寒不燥，含有豐富蛋白質、氨基酸以及蟲草素、甘露醇、SOD、多糖類等成分，能夠綜合調理人機體內環境，對增強和調節人體免疫功能、提高人體抗病能力有一定的作用；螺片有滋陰補腎及健肝益脾的功效，同時亦有助調理身體及腸胃；准山有健脾胃，補益肺氣，滋腎固精；杞子有滋養強壯及明目功效。(網上資料)

蟲草花1両、雞腳10隻、螺片3片、杞子1水竹湯匙、淮山1両及瘦肉約$20~

螺片先浸至軟身(大約15-20分鐘)~

其他藥材就浸洗一陣~

雞腳及瘦肉洗淨汆水~

記得啲腳趾唔好剪，因為一剪左就會係煲湯過程漏左啲雞油出嚟，咁成煲湯就一定會好油啦~

相關文章：【生津清熱】合掌瓜馬蹄椰棗瘦肉湯

煲內放約2.5L水，然後加入所有材料~

待滾起後，就用大火加蓋煲約30分鐘~

再轉慢火加蓋煲多1.5小時~

最後加入少少鹽調味，就可以飲啦~

蟲草花湯小小豬一向都鐘意飲，今次仲加埋螺片一齊煲，啖湯甜到冇朋友，所以乖乖添完再添，飲到肚仔脹卜卜，真係飲完湯都唔洗食飯啦...哈哈哈！

老公就對啲雞腳情有獨鐘，煲湯依10隻雞腳話咁快就俾佢一個人KO晒，佢說好的減肥呢...哈哈哈！

溫馨提示：
- 由於個別人仕體質不同，所以大家記得煲之前了解下自己，如有疑問，請先向註冊中醫查詢！

Text & Photos：小小豬Kinsey

【誠徵Bloggers！】想分享你的懷孕及育兒日常？請將投稿連同約40字個人簡介和近照一張，電郵到： [email protected]，我們會幫你開設個人專欄，文章經編輯部潤飾後更有機會刊登在FB專頁，快點踴躍投稿吧！