6個管教錯誤 爸爸媽媽要避免!

6個管教錯誤 爸爸媽媽要避免!

mami熱話
ByCircle on 16 Aug 2019 Digital Editor

生咗BB後,身份唔同咗,其實好多嘢都要由頭學過。一邊學習照顧孩子,一邊學習點做一對令人滿意嘅父母。喺新手父母呢條道路上,教導孩子係一件好重要嘅事!雖然過程中有機會做錯好多事,不過唔緊要,同小朋友一齊成長。以下呢6件事如果你成日做嘅話,最好真係盡快改善啦!

MamiDaily
Photo from MamiDaily

1. 過度照顧
做咗父母後,真係好怕見到仔女病同埋受傷,所以真係忍唔住無微不至咁照顧佢哋。幫佢哋著衫、餵食飯等等,只要可以幫到佢做嘅嘢都會幫手!不過過份照顧孩子,只會佢唔識點樣保護自己同照顧自己,實際上反而係害咗佢。

2. 安排一切
小朋友愈嚟愈大,開始有自己嘅思考應力,應該畀返啲自主權佢哋。家長唔應該咩都幫佢哋安排好晒,又唔考慮佢哋嘅意見。咩都按照父母嘅計劃,小朋友好容易會失去生活嘅熱情,又會限制佢哋嘅想像空間!

MamiDaily
Photo from MamiDaily

3. 語言暴力
明白照顧不受控嘅小朋友,心情一定會受到影響,好容易躁底。不過父母記得唔好衝口而出,傷人嘅說話講出口就係一世!例如同仔女講:「你再咁曳,信唔信我唔要你啊喇?」呢啲說話會令小朋友自尊心受挫。

廣告
廣告

4. 完美主義
家長事事都想小朋友做到最好,有要求係無錯嘅,不過如果過份挑剔就會影響孩子成長。父母應該畀佢哋自由發揮,就算無想像中咁好都唔好逼得太緊,人仔細細背負咁大壓力或會導致心理不健康!

MamiDaily
Photo from MamiDaily

5. 胡亂指責
每逢小朋友闖禍或做咗啲唔啱父母心意嘅事,都忍唔住大爆發大聲指責佢哋。父母應該先控制自己嘅情緒,了解清楚發生咩事,問真啲小朋友點解要咁做先睇吓要點解決。一味指責完全幫唔到件事,仲會搞到小朋友唔開心。

6. 只顧說教 忘了身教
父母有時見到小朋友做錯事,例如食飯嘅時候,一邊食嘢一邊講嘢,爸爸媽媽可能會叫佢哋唔好咁做,原因係好易釀成意外。不過同一時間父母都要遵守同孩子一齊訂立嘅規則,唔係大人等於大晒,身教一樣重要!

MamiDaily
Photo from MamiDaily

Text:Mami Editorial

Share to Facebook