【點揀好陪月，避免踩地雷？】

By 比卡媽媽 on 29 May 2019

90後P牌媽媽文字記錄劉B每一刻的小美好照片捕捉劉B每一個成長痕跡

好的陪月員除了識湊B，更會是你的情緒開導員！

產後情緒唔太穩定，休息唔夠又對自己冇信心，甚至會埋怨另一半，好多野都睇唔過眼。慶幸遇到好陪月，坐月為我們打點一切，更分享經驗，穩定我和先生軍心，一致向BB，才好好休息了兩個月。

點揀好陪月，避免踩地雷？
*第一印象—外表和談吐
BB最重要兩樣野，1) 乾淨，2)態度。照顧BB衛生很重要，試問一個人連對自己衛生都冇要求，佢會照顧得BB乾乾淨淨嗎？其次，留意她的談吐，說話語氣及語速帶給你什麼感覺？BB會很受身邊人的神態和氣氛感染，一個既溫柔又平和的陪月姨姨就岩晒！

*專業資格＋實際經驗值
由於非由熟人介紹，再加上我最怕口講口賠的人，所以有實質證書有助我了解陪月多些。ERB陪月證書都是BASIC野，如果有額外進修會再加分！例如：食療/營養學/催乳/按胸等等。你可能會話證書並不等於一切，讀左未必識做，但肯進修更多相關知識，某程度上代表佢有心做。（請人從來都係搏一搏～～）其次，了解實際經驗，曾經接過幾多單，會否有僱主推薦信等等都非常重要。

*清楚雙方期望（陪月是傳統型定新派型？）
初次見面，可以談談自己預計的分娩方式及會否有餵哺母乳打算，然後問問陪月有什麼補身建議/照顧安排。我當初決定了開刀及打算餵哺母乳，陪月就建議坐月兩個月，頭一個月不宜進補，第二個月才吃一些補身食品，也建議了一些膳食安排。此外，陪月也預告我的產後生活習慣，例如：可唔可以洗頭？可唔可以掂水？ETC。其實舊時很多禁忌，都只因為以往環境未必很好而形成。坐月期間，我沒有洗頭一個多星期，因為天氣冷，產後人比較虛會容易著涼，但之後就可以用薑水/艾草水洗澡洗頭，最緊要是吹乾頭髮！你話啦以前D人邊有風筒吹乾？又邊有暖氣以防凍親呢？

*實質工作範圍要講明
陪月唔等於工人！湊B買餸煮飯給產婦～網上經常有人說陪月打斧頭，買餸時間長。簽約時要與陪月講清楚工時安排，多數會買完餸才返工，我們共識計算45分鐘買餸時間。買餸錢就每星期結算，必需取回收據，最重要是共識你每日既買餸BUDGET！！先小人後君子嘛，我每日約$250，燉補湯買新鮮雞另計，但同時你都要講清楚對餸菜有什麼要求啊！還有，可事前問陪月取一張藥材海味清單購買，豐儉由人，因應需要買也可以避免誤會啦～～

*家訪！屋企環境要視察
小妹不入廚房，好多廚房架餐都不齊，燉盎無大煲又無，所以一旦確定陪月就要事前家訪，了解有什麼裝備要補給～～廚房以外，BB用品是否齊全，家居環境是否安全，會否有隱藏危險的地方？？好的陪月都會根據經驗，提點一下。好多時誤會都因為溝通不足，所以記得與陪月溝通多些，了解雙方期望，誤會自然可以避免啦！祝大家搵到好陪月！事事順利！