【母乳之路到1歲CHECKPOINT 順其自然就會走更遠】

2018年9月分享過...殺出我的母乳之路...得到好多同路人支持同鼓勵...分享同時收到好多新手媽媽INBOX問我上奶方法...其實...我係即泵即食...未有做雪奶冰奶...只要夠食就算了...

由補奶粉到全泵奶...每啖媽媽奶真係得來不易...

母乳之路唔經唔覺一步一步走到一歲啦...而我就由全泵奶媽變左做全埋身奶媽...

原本我以為唔可能成功做到埋身媽...一心一意做個泵媽...

不過...一個機緣巧合下...星雨自動埋身食奶...

話說十月六日去左飲茶...點心遲來了...變相要延遲泵奶...

我要一邊泵奶一邊攬住星雨...星雨突然張開咀食奶...

好感恩...我聽到吞嚥聲音...証明星雨真係飲到奶...

埋身只有短短五分鐘...已經令我好感動...

突如其來既成功...激起左我再次嘗試轉埋身既念頭...

十月七日開始一邊泵定奶...一邊留來試埋身...

星雨唔係次次肯埋身...一日五餐奶只有一兩次肯啜...

啜既時間有長有短...長至十五分鐘...短至五分鐘...

直至十月十七日做到一日五餐全埋身...

可惜...十一月三日食蛋黃引起左痾嘔...

星雨全日唔肯埋身...只肯啜奶樽飲奶奶...

隨後幾日...間中有一兩餐肯埋身...直至十一月八日終於做到全埋身...

埋身成飽奶就瞓覺...望住星雨熟睡...我覺得好感恩...

我竟然成功做到埋身...個種感覺真係好微妙...真係非筆墨可以形容...

一日五餐奶...夾雜加固一至兩餐...

全埋身真係比泵奶方便好多...唔需要洗奶泵...奶樽...慳番好多時間...

原本一日泵六次奶...變左夜晚瞓前泵一次...

直至十二月十日...因為水痘發高燒既星雨胃口唔係太好...只肯埋身啜奶奶...

一整夜抱住星雨...未有時間泵奶...

生病嘅星雨勁痴身...經常要抱抱...

隨後兩三日只肯埋身食奶...唔肯食固體食物...

隔左幾日...終於可以有時間泵奶啦...

發現泵得好少就索性唔再泵啦...

隨住加固越食越多...一日只食三四餐奶...

加固進度理想...星雨食奶食少左好多...

每次埋身時間越來越短...有時時間係短到令我會諗究竟有冇食到呀?

身邊嘅隊友會問我...咁快食唔食到架?食得太少奶唔得架...不如轉食奶粉啦...

我只能夠講如果唔夠...應該唔會放咀...放咀即係夠啦...

需求唔多...奶奶供應自然減少...

星雨食奶又心急...啜唔到奶就唔肯啜...

其中一邊出奶較為順暢...星雨就經常啜...

攪到一邊大一邊細...

有時出街隔太耐...大個邊就谷到好硬好實...細個邊依然軟淋淋...

大細邊係好難睇...不過...係唔會阻止到我餵人奶...

星雨一歲...身邊開始有人問我幾時戒人奶...

老實說...我係想餵到自然離乳...

除非有突如其來的原因...除非我收左奶...

自然離乳好似好遙遠無期...事實上睇過好多母乳媽媽分享...

兩歲多三歲BB就會自然離乳...唔再食奶奶...

到時想餵都冇得餵...戒奶何必急於一時呢?

來到一歲CEHCK POINT...我覺得自己已經好叻啦...

初初未上到奶到上到奶...開始日泵夜泵嘅生涯...

泵到第一個CHECK POINT...依然堅持泵落去...

繼而再到成功轉做全埋身...既然泵可以堅持...我相信埋身一樣可以堅持落去...

只要星月肯埋身...我就會繼續餵...

懶理...一大堆可以不理嘅說話...

咁大個仲食咩人奶?

~只不過選擇食人奶唔食奶粉...其實奶粉一樣係奶...

食人奶既BB好痴身架?

~我就係想星雨痴我...

咁大個仲食好醜怪...

~我又唔知有幾醜怪...食奶啫...我覺得食奶個畫面係好扣人心弦囉 ...

人奶點夠營養呀?

~只要我飲食均衡...人奶就無問題...加上一歲BB已經係固體為主...人奶只係輔助...

食人奶出街唔方便架...

~全泵奶個陣我試過啦...唔算唔方便...奶粉仲唔方便...又要帶奶粉又要帶水開...

埋身餵只要一條餵奶巾就得啦...

人地點講係人地嘅事...唔好理咁多...唔好俾自己壓力...

只要想餵就餵...除非餵唔到...

我明白餵唔到個種心情...唔好懷疑自己對仔女嘅愛...

餵唔到人奶要餵奶粉一樣係愛嘅表現...因為愛...捨不得仔女肚餓...

媽媽對孩子既愛係獨一無二...

好多野係唔需要強求...放開懷抱可能會有意外收獲...

好似我咁...補過奶粉餵飽星雨...之後一樣可以做到全人奶...

唔好諗飲過奶粉就番唔到轉頭...奶粉唔係毒藥...只係母乳以外嘅一個選擇...

我唔係幫奶粉商賣廣告...宣傳奶粉...

只是希望俾個心理準備想餵母乳既準媽媽...唔好諗得母乳之路太過美滿...

一路上係有機會遇到問題...未上奶...塞奶...乳腺炎...等等...

唔好太過擔心...唔好太過執着...要小心自己產後情緒...

遇到母乳問題...可以請教下健康院姑娘...或者母乳同路人...俾個機會人地去幫你...

母乳路不孤單...周圍有好多同路人...

無論埋身親餵同泵出黎樽餵一樣係母乳媽媽...

泵媽們...唔好睇少自己...泵奶一樣可以行得好遠...只要肯堅持...

我知道好多泵媽好想可以成功埋身...不過...

真心講一句...心急真係唔會有幫助...

有時順勢而行...奇蹟可能會出現...

母乳路唔易行...好需要得到鼓勵同支持...希望我可以走得更遠...直到自然離乳...

共勉之...

＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝

Text & Photos：MR. MOON & RAIN 甜心小屋

【誠徵Bloggers！】想分享你的懷孕及育兒日常？請將投稿連同約40字個人簡介和近照一張，電郵到： [email protected]，我們會幫你開設個人專欄，文章經編輯部潤飾後更有機會刊登在FB專頁，快點踴躍投稿吧！