專家：玩具過多 阻礙兒童思維發展

每次出街見到玩具，小朋友都扭買，屋企愈堆愈多玩具！依家係好機會清清佢啦～ 美國有研究指出，有太多玩具，未必幫助到兒童發展，反而對佢哋不利㖭！

美國俄亥俄州托萊多大學（University of Toledo）嘅研究人員搵咗36個幼兒，邀請佢哋喺一個房間入面玩半個鐘。而佢哋將呢批小朋友分成兩組，一批小朋友有4款玩具，而另一批就有16款玩具。

Photo from Shutterstock

呢項研究嘅策劃者Carly Dauch博士表示，呢個研究主要係想搵出小朋友玩玩具嘅質量會唔會畀玩具嘅數量影響。喺觀察佢哋玩樂嘅過程中，研究人員發現擁有少啲玩具嘅小朋友更有創意，加上佢哋會仔細研究每個玩具嘅用途，令玩嘅時間比另一組小朋友多兩倍。

Photo from Shutterstock

多啲玩具嗰組參加者，因為有太多玩具，令佢哋不停會受到其他玩具干擾，導致分心影響玩玩具嘅時間同深度。因此，喺少啲玩具嘅環境下，小朋友可以專注探索同款玩具嘅創造性，訓練佢哋嘅思考能力，更加足智多謀，對佢哋未來嘅發展更有幫助。

各位家長～ 係時候斷捨離啦！唔止屋企可以空返多啲位，原來仲會對阿仔阿女嘅成長有幫助㖭～

Photo from Shutterstock

Text：Mami Editorial
Source：the journal Infant Behaviour and Development