公主風運動美照衝擊眼球！ 美攝影師為女兒拍攝「運動公主風」引網友激讚

如果聽到女兒被讚「好可愛嘅小公主」、「好少女樣」，爸爸媽媽會有咩感覺呢？或者會暗暗開心女兒被讚賞，但呢句說話就令到美國一位攝影師媽媽Heather Mitchell成晚都瞓唔著，徹夜思考點解自己深愛運動嘅女兒要被性別定型呢？難道女孩子就只有成為大眾眼中優雅嘅小公主先值得被讚賞？於是第2日就為女兒拍攝一輯衝擊大眾眼球嘅「運動公主風」相片，令大家認識到「公主們」都可以好有型！呢輯相一出，旋即引起一眾媽媽嘅好評，紛紛請Mitchell為自己女兒影呢輯有型嘅公主相！

Photo from HMP Couture Imagery

美國攝影師媽媽Heather Mitchell有一位8歲嘅小女兒Paislee，最近開始玩壘球呢項運動，當Mitchell同其他媽媽閒談時，表示希望小女兒好有運動細胞，希望佢會愛上呢項運動，點知有一位媽媽唔認同，表示Paislee睇落個樣好少女，根本唔似會行運動路線。

Photo from HMP Couture Imagery

就係呢句說話令Mitchell整晚難以入眠，唔明點解女兒要因為性別而被旁人決定咩先係最適合佢，唔通個樣生得可愛同少女就唔適合做運動？於是Mitchell就靈機一觸，將公主風同運動結合起黎，為女兒拍攝出有型有格嘅公主風運動照，打破大眾一般對公主嘅印象。

Photo from HMP Couture Imagery

當Mitchell將呢輯相放上Facebook後，即引起好多父母嘅興趣，紛紛拜託Mitchell為自己嘅女兒影呢種風格相，好快將Mitchell嘅檔期填密晒！

Photo from HMP Couture Imagery

Mitchell希望透過呢輯相可以話畀所有小男孩、小女孩聽，唔需要因為自己嘅性別去勉強自己鍾意或放棄某啲喜好或鍾意嘅事物，任何人都有權去選擇欣賞自己覺得美麗嘅事物、有興趣嘅運動、做自己嚮往嘅事，而唔好受其他人刻板嘅印象而限定自己。

Photo from HMP Couture Imagery

Text：Mami Editorial

圖片授權：HMP Couture Imagery