媽媽糖尿病併發症發作暴斃 5個月大BB見媽媽影片即不哭

By race.cheng on 11 Mar 2019

英國有位19歲媽媽因糖尿病併發症發作，突然喺屋企暴斃，事隔2日後先被發現，而當時屋企嘅5個月大嘅仔仔一直伴隨，BB亦出現脫水，需要送院救治。

媽媽Courtney喺4歲時已確診患上第一型糖尿病，需要一直服用胰島素控制病情。Courtney嘅家人指，因為Courtney幾乎每一日都會上載BB嘅照片，但出事前兩日失去消息，到屋企揾佢亦無回應，所以報警後發現悲劇。

當時BB一直伴隨媽媽身旁，由於身體已經出現脫水，所以立即送院，現時情況穩定，亦由Courtney家姐照顧。屋企人指，BB有時都會大哭，但當見到有媽媽Courtney嘅影片就會立即收聲，希望影片入面嘅聲音令BB安心，覺得「媽媽仍然喺身邊」。

Courtney媽媽指，事發前兩日，Courtney指自己好似患感冒，媽媽建議送BB到家姐屋企照顧，但Courtney覺得家姐都有2個小朋友照顧，會加重家姐負擔，所以拒絕媽媽建議。

Courtney原來同男友同住，但事發前一星期分手，所以Courtney獨力照顧BB。媽媽亦痛心Courtney為做媽媽不辭勞苦，指囡囡一直希望做媽媽，但因病患影響不易懷孕，亦曾擔心自己一世都唔能夠做媽媽。Courtney曾經兩度小產，喺去年再次懷孕時，因為身體太弱，結果要提早2個月剖腹分娩，媽媽指，依嗰BB得來不易，而且代價太大，希望能夠盡一切努力幫Courtney保護BB。