面對再有孩子會隨時離開兩夫婦比任何人都痛苦

By race.cheng on 28 Dec 2018

英國有對夫婦嘅4名孩子都不幸患有罕見遺傳病，其中3名因腦損傷惡化，相繼離世，三囡Jade雖然亦不幸患有遺傳病，但仍然倖存至今。

46歲嘅Craig同33歲老婆Adele喺2011年痛失2囡Angel，當時Angel只有3歲，而4年後，再失去9歲嘅大囡Jasmine，而細仔亦喺2014年出世3個月後過世，3名小朋友都係患有萊氏症。

其中3囡Jade雖然都不幸患有罕見遺傳病，但仍然倖存。可惜，近日Jade嘅身體開始變壞，醫生指，萊氏症嘅小朋友通常係1歲時出現病症，存活率通常只有3年，仍有成功活到成年期嘅個案，但Jade近日情況轉差，可能會隨時離開。

現時Jade嘅智力只有2歲，實際年齡就有8歲，時不時會出現嚴重癲癇。爸爸Craig希望同Jade嘅相處日子，一日得一日，佢哋兩夫婦已經再難以承受失去孩子嘅傷痛「我哋失去一個孩子後，上天又畀返一個我哋，但又再奪走一個，係一個痛苦循環」

Craig指：「失去3名孩子後，鄰居都以為我哋有傳染病，就算以前大囡番學都被人歧視，指住我哋話要消毒。」甚至有人質疑佢哋「點解唔避孕」但Craig指「每位小朋友都係意外懷孕，即使已經做好避孕措施都懷孕了，但我哋唔想墜胎。」

雖然好多人認為佢哋兩夫婦選擇繼續生BB係錯誤決定，但Craig同Adele就認為，生命始終都係生命，既然佢哋嚟咗，佢哋唔可以決定孩子可唔可以繼續留喺世上。如果當初放棄Jade，Jade就唔會同佢哋係世上一齊過咗8年，或者其他人會覺得係痛苦，但係Craig同Adele就珍惜同每位孩子一齊嘅每段回憶，但當孩子離開後，佢哋兩夫婦比任何人都痛苦。