【全職媽媽見證寶寶成長每一刻 放棄工作不談後悔】

曾經有人問我：「你咁後生留係屋企全日湊住BB唔會後悔咩？成日係屋企唔悶咩？你揾人睇住呀囡就可以去翻工喇！」

首先，我個人認為BB嘅成長階段好重要，而且佢哋大得好快，作為媽媽嘅我好想珍惜佢成長嘅每一個寶貴時刻。冇錯！我年紀尚輕好多野都未試過，未做過，但我覺得BB的成長之路比我的青春還重要！

每一次見到紫晴有新嘅行為，動作我都會好開心，而且好感恩我可以一直陪伴佢長大。

的而且確有時係屋企太耐真係會有啲悶。我會趁呀囡瞓覺嘅時候做一啲自己鐘意做嘅野去減壓，例如睇下Facebook，youtube等等，又或者等老公收工出街食個飯放鬆下自己。而老公亦相當識做放假嘅日子都會留俾我地。

自從知道有咗紫晴之後我就辭去原先既工作，好好留係屋企安胎準備做一位全職媽媽。

小朋友出世黎到呢個世界上係一張白紙，佢地咩都唔識，唔知咩係岩，咩係錯。而我地作為家長嘅其中一個責任就係好好教導下一代。

我自己好深信一點「言教不如身教」。而最好嘅教導方式就係「身教」，小朋友嘅吸收能力好快而你就好似一塊鏡咁，你做啲咩，佢就會跟住做啲咩。

呢個咁重要既事情上我覺得我唔應該假手於人，而人地亦冇責任要教導好你既小朋友。最大嘅責任都係落嘅我地為人父母既身上。我唔敢講我會教得囡囡好好，我只能夠講我會盡自己既努力好好教導佢。

小朋友真係大得好快，眨下眼紫晴已經8個月大了。能夠一直照顧佢，見證住佢既成長真係一件好寶貴嘅事情，亦都要好感謝老公支持我做全職媽媽。

＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝

Text&Photos：Chrissie

【誠徵Bloggers！】想分享你的懷孕及育兒日常？請將投稿連同約40字個人簡介和近照一張，電郵到： [email protected]，我們會幫你開設個人專欄，文章經編輯部潤飾後更有機會刊登在FB專頁，快點踴躍投稿吧！