由有咗BB開始 媽媽注定要犧牲嘅3樣嘢

成為媽媽後，BB成為媽媽生活嘅重心，為咗全天候照顧好BB，媽媽好多時要犧牲下面3樣嘢都在所不惜！

1.外貌

由變成大肚婆嘅一刻起，媽媽嘅身材已經不復從前。直到BB出世後，肥胖、橙皮紋、脫髮等問題仍會緊隨媽媽，風別喺肚皮上嘅橙皮紋更會成為媽媽一生嘅印記。加上生活變得忙碌，媽媽連敷面膜嘅時間都欠奉，就算有時間都情寧願花心機幫BB打扮，多過同自己妝扮，久而久之，媽媽亦逐漸變成一副師奶相。

2.興趣

BB未出世前，媽媽可以隨時煲劇、網購、睇書、整下手作仔⋯⋯媽媽絕對可以數得出時下最新嘅電影、劇集、時裝等等。但當BB出世後，以前嘅呢啲興趣就會一一變成過去式，取而代之嘅就係BB成為媽媽每日嘅重心，BB嘅興趣變成媽媽嘅興趣，BB鍾意嘅玩具、食物、音樂、遊戲、書籍等通通都變成媽媽最熟悉嘅事物，有時會令媽媽覺得已經失去自我。

3.事業

在職媽媽要同時兼顧家庭同事業，有時會因家庭因素而要推卻某啲公事，影響升遷機會；有啲媽媽就會為BB放棄自己嘅事業或理想，成為全職家庭主婦。旁人總以為係幸福少奶奶，咩都唔駛做。實情係年中無休，每日都要同時間競賽，喺指定時間內餵BB飲奶、食粥、做家務⋯⋯當忙起上嚟，BB又唔合作嘅時候，分分鐘連自己食飯嘅時間都冇埋。有時諗到以前嘅同學或同事已係事業上有一定嘅成績，甚至做緊自己理想嘅職業時，自己就默默做一個冇咩人識欣賞嘅家庭主婦，失落感都油然而生。

媽媽或者會失去咗上面3樣嘢，但BB亦會為媽媽帶嚟好多感動、歡樂同美好嘅回憶，得到往往多過失去，足以彌補媽媽嘅遺憾。

Text: Mami Editorial