孕中間最舒服 媽媽可以放心做3件事

懷孕踏入第4個月，準媽媽終於捱過咗懷孕初期嘅各種不適症狀，而胎兒亦度過咗最容易流產嘅唔穩定時期！由而家開始，孕媽媽終於可以好好享受懷孕期當中最舒適嘅孕中期！

1.食嘢

喺懷孕頭3個月，孕媽媽經常都會覺得冇胃口，食咩都冇味咁，但去到孕中期，媽媽嘅胃口就返晒嚟！為咗胎兒各方面可以順利發育，媽媽每餐都應該要有均衡飲食，餐單中要包含各種營養，如蛋白質、維他命、鈣、鐵、纖維等。不過孕媽媽都要記住，雖然可以食返多啲嘢，但都要控制下食量，避免體重急劇增加，同埋要避免進食對胎兒有害嘅食物。

2.旅行

懷孕初期係出血同流產風險最高嘅時期，而孕後期媽媽行動不便又即將臨盆，所以普遍婦科醫生都認為懷孕4個月至6個月係孕媽媽最適宜去旅行嘅時期，因為呢個時候嘅胎兒已經相對穩定，而孕媽媽又冇生理症狀嘅困擾，所以不妨同另一伴計劃去一個2日1夜嘅短途小旅行，放鬆一下心情！不過如果孕媽媽曾有見血或各種懷孕不適症狀嘅話，應該先咨詢婦科醫生嘅建議。而孕媽媽喺旅行途中亦要注意自身安全同飲食，應避免去一啲天氣不穩或會散播傳染性疾病嘅地方。

3.同另一伴愛愛

長達10個月嘅漫長孕期，相信孕媽媽或準爸爸都覺得好難「忍耐」，想要愛愛嘅慾望亦會愈黎愈強烈，其實喺孕中期嘅準爸爸媽媽亦可以適量享受性生活㗎！不過一定要喺雙方都感覺良好、孕婦身體冇不適、胎兒穩定同冇異常情況下進行，記得要做好安全措施，需要戴上安全套，動作亦必須輕柔，避免壓到胎兒！

Text: Mami Editorial