辛苦但甜蜜 5個準媽媽專享嘅服務

陀住BB嘅時候，身體上會有好多變化都令到媽媽唔舒服同唔方便，不過好彩身邊有另一半會體諒同用行動支持，將各位準媽媽當女王一樣服侍周到！而家同大家一齊細數另一半5個超貼心嘅行為，睇下身邊嗰位做過幾多項吖！

1. 幫著鞋

當個肚愈黎愈大，想坐低著鞋基本上係一件難事。唔好話彎腰呢個動作有機會整親肚入面嘅BB，就算媽媽想彎腰都會畀個大肚頂住！通常老公見到呢個情況，就會自動自覺單膝跪低幫媽媽著好對鞋，係咪即刻成個灰姑娘著玻璃鞋嘅畫面出哂黎呢？

2. 扶走路

挺住巨肚嘅媽媽行路嘅時候，可以話係一步一驚心，尤其係天雨路滑嘅時候，最怕一個唔覺意跣低會危害BB！所以同老公出門嘅時候，老公都會傍到實，仲會當準媽媽係太后一樣攙扶。

3. 拎手袋

老公都會記住大肚嘅媽媽係唔可以拎重物，因為怕拎重物時腹部用力而影響BB，所以老公會索性唔畀媽媽拎任何嘢，連平時好抗拒嘅女人手袋佢都搶住幫你拎呀！

4. 煮食

好多時媽媽喺懷孕期間時口味都會唔同哂，仲可能忽然想食某啲食物，體貼嘅老公會隨時做好煮嘢畀媽媽食嘅準備。

5. 跑腿

喺懷孕後期，媽媽會連行路都覺得好吃力，所以當要買嘢嗰陣，老公就要幫忙做跑腿，畀媽媽可以安心喺屋企休息。

所以當媽媽懷孕唔好受嘅時候，請記得另一半都有為自己付出㗎！

Text: Mami Editorial