可以嘅話我都想餵母乳 餵配方奶嘅媽媽唔代表唔愛BB

好多媽媽都希望生咗BB之後可以全母乳餵哺，可惜事與願違，有部分媽媽會因為唔同原因而被逼放棄餵母乳，改以配方奶餵BB。或者係母乳媽媽眼中，係佢地唔夠堅持；但事實上，佢地都會好羨慕母乳媽媽，但奈何種種原因：唔上奶、長期食藥、返工等而被迫放棄。佢地甚至會有罪疚感，認為係自己做得唔好。佢地嘅自責同難過，大家又知幾多呢？

1.覺得自己做唔到好媽媽

健康院非常鼓勵媽媽餵哺全母乳，當配方奶媽媽帶BB去健康院打針時，每次總會被姑娘問到BB飲配方奶定人奶，呢個時候總會覺得好有罪疚感，認為俾奶粉BB飲嘅自己係好差勁，當聽到其他媽媽奶量充足，可以餵全人奶時，就會感到好羨慕，更會認為自己唔夠人奶媽媽好。

2.將BB病嘅原因歸於自己

媽媽都知道母乳充滿抗體，所以母乳BB身體嘅抵抗力都會好好多，即使有小病，都可以靠飲母乳而康復。但配方奶冇抗體，所以BB病咗嘅話，配方奶媽媽都會覺得係自己嘅錯，累到BB唔夠抵抗力而要食藥。

3.覺得BB會唔夠母乳BB聰明

母乳中含有大量活性細胞可促進BB腦部發展，而呢D成份係配方奶所欠缺，所以配方奶媽媽會覺得BB唔夠母乳BB嘅聰明，令佢地輸在起跑線上。

其實無論係母乳媽媽定配方奶媽媽，都一樣咁愛自己嘅BB！希望所有媽媽都可以互相支持、打氣！各位媽媽，加油！

Text: Mami Editorial