【加固食譜】世上冇唔識入廚的媽媽!親力親為「懶媽媽」之嬰兒加固心得分享!

【加固食譜】世上冇唔識入廚的媽媽!親力親為「懶媽媽」之嬰兒加固心得分享!

爸媽分享 bloggers 新手媽媽 幼兒飲食
By孫師奶的媽媽日記 on 13 Apr 2020

成日被美食照片洗版,好多「無飯媽媽」突然變「廚神」,孫師奶都唔例外,真係要多謝「武漢肺炎」!孫姑娘自加固一直以來都幾抵錫,非常珍惜食物,通常都會食晒為止,連零食手指餅都唔例外,所以我哋都好懶,上個月幾乎日日都係食粥,食到佢都開始發憫憎,開始揀飲擇食,每晚食飯都好似打仗咁,身心俱疲。

直至上個月尾,有一晚老公同我講,其實我哋都唔可以怪阿女,將心比己,我哋日日都食差唔多嘅嘢都會食到厭,何況一個只有14個月大嘅小朋友呢?

嗰一晚我突然之間醒覺,的起心肝不斷用盡所有網上工具,研究好多唔同嘅食譜,又不斷諗吓點樣可以調製嬰兒版本,務求令阿女食得開心,有新鮮感之餘食得更有營養。親力親為,會更加觀察到個女嘅飲食習慣,見到孫姑娘食得開心,真係好有滿足感!

有相為証,煎得唔靚,不過我信practice makes perfect,下次再接再勵。

Day 2 - 三色蒸蛋 (三文魚+豆苗+紅蘿蔔)

Day 3 – 鮮茄三文魚焗飯

Day 4 – 南瓜肉碎炊飯

廣告
廣告

自己煮過就會更加明白,煮嘢食真係唔難,難就難在要諗今日煮咩好!真心佩服煮咗咁多年嘅媽媽,喺時候到我為個女做多少少,繼續堅持每日為孫姑娘親自預備最少一餐♡♡♡

♡孫師奶背景♡:香港土生土長嘅女生,屋企人擅長煮嘢食,亦唔主張我入廚房,一直都有嫲嫲、爸爸、媽媽、老爺、奶奶同埋老公照顧,所以從來都唔使自己入廚。婚後間中做下「假日煑婦」,生BB之後繼續工作,有工人姐姐煮飯,總括來說入廚經驗值極低。 網絡資訊非常豐富,只要有心上網學習,好容易就可以搵到「零失敗」嘅煑食教學。世上沒有唔識入廚嘅媽媽,各位媽媽加油:)

♡小小心得分享♡:由淺入深,起初由「零失敗」、食材簡單嘅食譜開始,唔好一嚟就越級挑戰,見到自己嘅成品會有滿足感,慢慢累積經驗同滿足感,然後再挑戰難度比較高嘅食譜。

==============================
Text & Photos:孫師奶的媽媽日記

【誠徵Bloggers!】想分享你的懷孕及育兒日常?請將投稿連同約40字個人簡介和近照一張,電郵到:[email protected] 我們會幫你開設個人專欄,文章經編輯部潤飾後更有機會刊登在FB專頁,快點踴躍投稿吧!

Share to Facebook