【湯水食譜】健脾祛濕 蓮藕紅蘿蔔茨實瘦肉湯

早幾日老公話想食蓮藕，作為一個稱職嘅煮婦就當然盡量滿足佢嘅提意。正當我仲諗緊應該點煮蓮藕時，就見到依個合節氣嘅蓮藕紅蘿蔔茨實瘦肉湯，咁就又嚟試下依個健脾祛濕靚湯啦~

蓮藕健脾生肌、化痰止瀉、養胃滋陰；紅蘿蔔能夠清熱解毒，安定神經系統；茨實健脾除濕、固腎益精；無花果有健脾清腸、消腫解毒。(網上資料)

蓮藕一條(約一斤半)、紅蘿蔔1條、茨實一両 、無花果四粒、瘦肉$30~

蓮藕去皮切塊~

紅蘿蔔同樣去皮大塊~

茨實及無花果浸洗一陣~

瘦肉汆水備用~

煲內放約2.5L水，然後隨水加入所有材料~

待滾起時，用大火加蓋煲約15分鐘~

之後轉慢火加蓋煲2小時~

最後加入少少鹽調味，就可以飲啦~

老公一見到啲蓮藕都已經好滿意，基本上成煲蓮藕都俾佢食左大半，啖湯亦都唔錯，好香嘅蓮藕同埋紅蘿蔔味，小小豬又嚟大碗大碗咁飲啦！

哈哈...我依啲師奶仔平日都冇貢獻，間唔中整啲老公鐘意嘅湯水食材，就當係一個少少支持，等佢可以繼續安心工作(繼續努力返工賺錢俾我地兩母子去玩...呵呵)！

溫馨提示：
由於個別人仕體質不同，所以大家記得煲之前了解下自己，如有疑問，請先向註冊中醫查詢！

Text & Photos：小小豬Kinsey

【誠徵Bloggers！】想分享你的懷孕及育兒日常？請將投稿連同約40字個人簡介和近照一張，電郵到： [email protected]，我們會幫你開設個人專欄，文章經編輯部潤飾後更有機會刊登在FB專頁，快點踴躍投稿吧！