【湯水食譜】無胃口、易攰啱飲！提升免疫力 茯苓蓮子茨實烏雞湯

依排小小豬成日都話冇胃口，唔知係困係屋企悶到發傻，定係身體上嘅唔舒服，不過唔理咁多都係要攪攪佢，所以就上網搵啲開胃嘢整俾佢食。

見到依個健脾又益胃嘅湯水，屋企又有齊材料，只係落街快閃買隻烏雞就得，咁就當然即刻煲依個茯苓蓮子茨實烏雞湯俾豬大少飲啦~

烏雞半隻、淮山一両、茯苓一両、蓮子一両、茨實一両、紅棗六粒、蜜棗兩粒及陳皮一角~

棗洗乾淨後去核。其實在一個好簡單方法就可以去核，就係用先拎住一粒棗，然後將筷子由頂部開始，慢慢用少少力咁穿過去，就可以好輕鬆咁去核啦~

陳皮浸軟後刮瓤~

其他藥材浸洗一陣~

烏雞洗淨汆水~

煲內放2L水，然後加入陳皮~

待水滾後加入所有材料~

待再次水滾後，用大火加蓋煲約15分鐘~

之後轉慢火加蓋煲多2小時~

最後加鹽調味，就可以飲得啦~

雖然係以藥材為主，但一啲都唔似藥材湯，入口仲甜甜地小小豬都話好飲。既然豬大少話好，咁就等我有恆心啲一星期煲兩次俾佢飲，等佢可以快啲有返胃口，咁就可以做返一隻有丁點肉嘅豬啦！

以下係各食材嘅功效，可以參考一下呀(網上資料)：

烏雞 - 含有大量蛋白質，而膽固醇含量極低，是高蛋白、低脂肪的滋補佳品。而且烏雞所含有嘅DHA和EPA物質還可以提高兒童智力，經常食用可以有效調節生理機能，提高人體免疫力。
淮山 - 有益氣養陰，補脾肺腎，對脾胃虛弱、倦怠無力、食欲不振、肺氣虛燥有好大治療作用。
茯苓 - 能夠健脾，還可以滲濕，可以補脾肺，治氣虛。
蓮子 - 有益心健脾，補腎及安神之效 茨實 - 有補脾化濕、益腎固精功效。
紅棗 - 均補心脾及益氣安神。
蜜棗 - 止咳潤肺、化痰平喘功效。
陳皮 -有通氣健脾，消滯健胃的功能。

溫馨提示：
- 由於個別人仕體質不同，所以大家記得煲之前了解下自己，如有疑問，請先向註冊中醫查詢！

Text & Photos：小小豬Kinsey

【誠徵Bloggers！】想分享你的懷孕及育兒日常？請將投稿連同約40字個人簡介和近照一張，電郵到： [email protected]，我們會幫你開設個人專欄，文章經編輯部潤飾後更有機會刊登在FB專頁，快點踴躍投稿吧！