【卸貨記錄】屯門醫院48小時食盡全餐生產記（上）

雖然已經係產後兩個月多，但生產過程仍然歷歷在目，仿如昨天發生一樣，我諗我一世都唔會忘記！

預產期1月1日的我，每日都同玥玥講記得準時出世啦，同媽媽一齊倒數。可惜仍然未有動靜！已經攞埋1月8日催生期，每日如常「食痾瞓」，唯一有少少唔同就係夜晚瞓覺多咗種「M痛」的感覺。

玥玥畀媽媽的信號會係見紅先？定瞓瞓吓穿水？終於喺1月4日早上起身去廁所見紅啦！之前一直同自己講入院前要飲杯好濃嘅蜜糖水/食朱古力，等可以加快產程。當然，當下我只係記得要沖涼，然後就嗱嗱聲執走佬袋再食啲嘢就入院。

去到屯門醫院，當時仲係疫症初期，老公仍然可以陪入院，上A7產前房，姑娘問下咩生產徵兆就示意老公先去辦入院手續。

然後我就跟姑娘去檢查宮頸（冇想像中痛，係有少少唔舒服）宮頸已變軟。由於第一胎普遍都係耐，姑娘安排我入住產前房等待，此時就要同老公暫時分開。

因為肺炎影響，晏就的探病時間取消咗只剩夜晚，一個人時間流流長都唔知點過。

放好行李後，姑娘安排駁機檢查寶寶心跳、宮縮及胎動。

延伸閱讀：
注意！老公進產房不能說的5句話
【BB成長日記】疫症下的QE新生嬰兒黃疸 | 私家醫院跟進服務公院收費

初期觀察半小時，期間醫生姑娘會不停黎檢查你的情況亦會有人黎抽血。在中午派餐前，突然有姑娘喺我身後掛咗禁食的牌仔⋯⋯ 甚麼？！我問姑娘點解要禁食，原來因為寶寶宮縮反應有幾下心跳drop了⋯ 只食咗巨無霸的我好後悔唔加多幾隻雞翼。

到咗夜晚探病時間，老公帶咗飯來，太肚餓膽粗粗問醫生可唔可以食野（心諗唔食野邊有力生仔？）醫生睇睇報告再探多次宮頸就話可以食嘢啦～真係餓死我！

去到夜晚九點幾，覺得陣痛強烈咗，即時開返個app count宮縮！

見大家都落床行來行去，我都跟住行睇吓可唔可以開快啲！初時8至10分鐘痛一次，姑娘話如果5分鐘痛一次先撳鐘。去到3點幾，開始痛密咗5-6分鐘痛一次，個子宮好似畀人「扭毛巾」咁，一痛個人就扭埋一嚿，撳鐘叫姑娘檢查，一度都未開過⋯⋯ 唔係呱？咁痛都無開到？之後又痛得疏咗，結果瞓著埋。

＜待續＞

＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝
Text & Photos：玥孩兒成長記 寶寶教會媽媽的事

【誠徵Bloggers！】想分享你的懷孕及育兒日常？請將投稿連同約40字個人簡介和近照一張，電郵到：[email protected] 我們會幫你開設個人專欄，文章經編輯部潤飾後更有機會刊登在FB專頁，快點踴躍投稿吧！