download MamiDaily 親子日常 app
【停課】防疫閉關多日 大人都會悶 要時刻注意孩子情緒變化

【停課】防疫閉關多日 大人都會悶 要時刻注意孩子情緒變化

懷孕 爸媽分享 教育心得 bloggers

閉關左咁多日,因為要去產檢所以一定要出門,加上爸爸放假,有人陪同就會安心啲。


一如既往,我地有同Aidan解釋因為要出門辦事,會帶佢去婆婆屋企玩,但我地會好快番,番黎仲會買蛋糕俾佢食。

因為婆婆住第二座,同我地勁近,所以佢由細到大都經常去婆婆屋企度,又多人陪佢玩,除咗我,佢最鍾意就係痴住婆婆。

同以往一樣,我地如常帶佢過去,但出發前佢開始問我地係咪出街?係咪去商場行街?會唔會搭車車?會唔會去餐廳食飯?
我地起初都唔太為意,係去的路程佢多次話要番屋企拎野,多次走回頭,半推半就去到婆婆屋企,除左對鞋又著番。
平時佢去到婆婆屋企會即刻跑去玩,從來都唔會好似今次咁,我果刻先諗佢應該係超級想同我地出街,佢以為我地可以去玩,閉關左咁多日,佢想搭車出街都好正常。但外面實在太多細菌了,我地又要去診所產檢,真係無辦法帶佢出去。
不停游說佢話會買好好味的蛋糕俾佢食,又會買新玩具俾佢玩,佢都唔願意放我地走,最後仲係婆婆懷裡放聲大哭,真係望到都覺得好心痛呀!

晚上接左佢番屋企,同佢一齊食蛋糕,佢開心到好似唔記得哂今朝件事咁。

但到臨訓前嘅一番對話,就知道其實佢真係好唔開心,佢問我今日出街點解唔可以帶佢去?點解唔可以去迪士尼玩?點解咁耐都唔番學?佢話好掛住老師、好掛住班同學仔、好想番學⋯⋯講下講下攬住我就訓著左。攬住仔仔果刻感覺真係百感交集,眼淚完全不受控制咁流下⋯⋯

係呢個防疫時期,小朋友太長時間留係屋企足不出戶,無得出街、無得去佢地鍾意嘅公園玩、無得去戶外放電,佢地都會覺得奇怪和唔習慣,情緒一定會有影響,唔好話小朋友,真係連大人都會頂唔順。

所以家長們要多啲同小朋友解釋和多聆聽佢地嘅內心感受,多觀察下小朋友嘅行為。佢地雖然細,但其實明白好多野,多些給他們安慰和鼓勵。

大家一齊努力,一齊祈求疫情快啲退,快啲係街上再見到大家的笑容!

==============================

Text & Photos:安妮媽媽親子日記

【誠徵Bloggers!】想分享你的懷孕及育兒日常?請將投稿連同約40字個人簡介和近照一張,電郵到: [email protected],我們會幫你開設個人專欄,文章經編輯部潤飾後更有機會刊登在FB專頁,快點踴躍投稿吧!

【隨時隨地接收更多育兒教育資訊】

📱 立即下載 MamiDaily 親子日常APP

🤱🏻 追蹤我們的 Instagram: mamidaily.hk

🔔 訂閱 MamiDaily 親子日常 Youtube頻道