【湯水食譜】提高小朋友免疫力 虎乳靈芝黨參燉豬腱

依排天氣咁凍，加上又流感咁利害，真係一不小心就好易感染傷風感冒，到時就大件事了。所以趁依家就做好預防，除咗日常好好照顧小小豬的衣著同加強保持清潔衛生之外，飲多啲强壯體質同埋增強抵抗力湯水，打好個底咁就唔怕好易作病。

今次就聽藥材店店主介紹，煲依個既好飲又有益嘅虎乳靈芝黨參燉豬腱啦~

虎乳靈芝對補益肺氣，對提高免疫力都有好有幫助；黨參有補中益氣、固本健脾；百合潤肺止咳；麥冬具清熱養陰、潤肺養胃；海玉竹養陰潤肺作用。(網上資料)

虎乳靈芝 半両、黨參半両、百合半両、麥冬半両、海玉竹半両、南北杏一湯匙、蜜棗2粒、豬腱約$35~

將所有藥材浸洗一陣~

豬腱切塊後汆水備用~

將所有材料放入燉盅內，然後加入1.5L滾水~

然後放入電子燉盅燉3小時~

最後加少少鹽調味~

飲得啦~

燉湯因為有密封住燉盅，所以材料唔容易流失水份，啖湯就自然會突別清香，所以小小豬都話今次啲湯好甜，同平日啲有少少唔同，好似好飲啲哦(哈哈哈...幾時變左一名小食家呀)。

個湯又真係唔難，加上小小豬又鐘意，咁我都唔介意煲多啲俾佢飲，打好個底都病少啲呀！

溫馨提示：
- 黨參屬性比較滋補，所以感冒者不易飲用！
-由於個別人仕體質不同，所以大家記得煲之前了解下自己，如有疑問，請先向註冊中醫查詢！

Text & Photos：小小豬Kinsey

【誠徵Bloggers！】想分享你的懷孕及育兒日常？請將投稿連同約40字個人簡介和近照一張，電郵到： [email protected]，我們會幫你開設個人專欄，文章經編輯部潤飾後更有機會刊登在FB專頁，快點踴躍投稿吧！