【湯水食譜】增強小朋友免疫力 虎乳靈芝蟲草花鱷魚肉煲烏雞湯

依排啲病菌真係好勁，除咗要小小豬返學帶口罩保護自己之外，都要煲啲比較補嘅湯水，咁先可以提高免疫力，冇咁易病嘛！

依個時候小小豬公公就為我準備咗一隻烏雞（即係竹絲雞），叫我煲靚湯俾佢個寶貝孫飲，就係咁....我就虎乳靈芝、蟲草花、鱷魚肉一齊煲，咁就可以補肺、強肺、潤肺三合一啦~

烏雞含有大量蛋白質，而膽固醇含量極低，是高蛋白、低脂肪的滋補佳品。而且烏雞所含有嘅DHA和EPA物質還可以提高兒童智力，經常食用可以有效調節生理機能，提高人體免疫力；蟲草花不寒不燥，具有補肺、補腎和護肝養肝功效；虎乳靈芝對補益肺氣，對提高免疫力都有好有幫助；鱷魚肉有滋陰潤肺、補氣補血、消腫利水及養顏等效用，對治療咳嗽、哮喘和風濕等症狀更見其效；沙參有助養陰清肺及益胃生津；玉竹則能養陰潤燥，生津止渴；淮山健脾開胃、肺氣虛燥；南北杏可止咳下氣，潤燥消積；陳皮主治脾胃氣滯、脘腹脹滿或疼痛、消化不良。（網上資料）

烏雞一隻、虎乳靈芝半兩、鱷魚肉一兩、蟲草花一兩、南北杏一湯匙、淮山一兩、玉竹一兩、沙參一兩、蜜棗三粒、陳皮一角及瘦肉約$20~

鱷魚乾浸至軟身（最少大約半小時）~

蟲草花浸軟身之後，然後要擠乾水份~

一定要擠乾水份，如果唔係湯會有一陣味，咁就唔好飲啦~

其他材料浸洗一陣~

陳皮浸至軟身，然後刮囊~

烏雞及瘦肉洗淨汆水~

煲內放約3L水，然後隨水加入陳皮~

待滾起後，加入所有材料~

繼續用大火加蓋煲約15分鐘~

之後轉慢火加蓋煲多1.5小時~

最後加鹽調味，就可以飲得啦~

溫馨提示：
- 由於個別人仕體質不同，所以大家記得煲之前了解下自己，如有疑問，請先向註冊中醫查詢！

Text & Photos：小小豬Kinsey

【誠徵Bloggers！】想分享你的懷孕及育兒日常？請將投稿連同約40字個人簡介和近照一張，電郵到： [email protected]，我們會幫你開設個人專欄，文章經編輯部潤飾後更有機會刊登在FB專頁，快點踴躍投稿吧！