【自製教材】DIY教材小分享｜生活認知 - 水果外形及顏色

自從樂悠媽不專業地分享咗幼稚園面試小貼士後，多咗媽咪同我吹下水交流下教BB嘅方法，又有朋友仔同我講話覺得教BB認顏色好難，今次就等老娘再次不專業地分享下本人係點教樂少嘅。

其實就咁教BB認顏色當然難，但透過小遊戲就會相對容易～通常我會以日常生活接觸到嘅嘢去教，例如樂少最愛食嘅水果，透過印有水果圖案嘅圖卡去教BB常見嘅水果種類。

1）主要係想教BB認識顏色，所以第一階段可以先以容易辨認顏色嘅水果開始：

紅色：蘋果／士多啤梨／提子／水蜜桃
黃色：香蕉／菠蘿
綠色：西瓜／番石榴／奇異果
橙色：橙

教法：先以圖卡教BB水果嘅特徵，例如：「香蕉係黃色」、「BB最鐘意食嘅」、「要MEET皮後先食得嘅」。

2）認識咗唔同顏色嘅水果後，再以遊戲方式加深BB嘅印象：試吓拎出BB最愛嘅公仔，然後叫BB喺遊戲卡中搵出水果畀公仔吃。

教法：先將碟圖卡放喺枱，再同BB講：「BB，公仔想食香蕉呀，你搵出嚟比佢食丫！」媽咪亦可與BB一起進餐，叫BB拎不同類型嘅水果圖卡畀你食就可以。

當然喺日常生活中去到超市，見到真嘅水果都不妨畀BB用手接觸一下，認知真實水果嘅質感！！

仲可以以角色扮演遊戲加深BB對顏色同水果嘅印象，咁樣教學就會變得有趣得多，容易令BB印象深刻啲，而且都係一個唔錯嘅親子遊戲呢～

＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝

Text & Photos：樂。悠。媽咪

【誠徵Bloggers！】想分享你的懷孕及育兒日常？請將投稿連同約40字個人簡介和近照一張，電郵到： [email protected]，我們會幫你開設個人專欄，文章經編輯部潤飾後更有機會刊登在FB專頁，快點踴躍投稿吧！