【戒片】幫小朋友戒片好頭痛？如何開始？

自己都係啱啱開始幫小朋友戒片唔夠幾個禮拜～只係每日喺屋企嗰幾個鐘頭，唔畀佢著尿片，只係著內褲，不停同佢講：「如果要去廁所就記得同媽咪講 Pee pee。」

Photo from MamiDaily

初頭嗰兩個禮拜都冇乜期望，只係希望慢慢嚟。 不過今個禮拜開始，日間都好少畀佢著尿片。而自己亦都察覺到佢嘅進展， 知道佢個身體其實開始控制緊唔瀨濕條褲仔。

我試過19個月嗰陣幫佢戒尿片 ，不過當然唔成功啦～因為次次佢都周圍瀨落地下同地氈。 就冇乜貼士可以畀大家。但只係希望所有父母要畀啲耐性， 要克制自己嘅情緒～如果小孩仍然瀨落地下，千祈唔好大聲責罵，以免造成小朋友嘅心理陰影，會怕咗去廁所、會怕畀媽咪鬧等等⋯⋯

Photo from MamiDaily

我個人就覺得戒片同學行路一樣，當小朋友個身體ready就自然會做得到。呢樣嘢真係強迫不來的～自己亦都覺得唔需要跟足衛生署嘅指引或者坊間嘅一啲戒片天書，因為每一個小朋友嘅進度都唔同，一定要多啲鼓勵、少啲責罵，同自己講「寶寶總有一天能夠做得到！」。

＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝

Text：比卡超人妻

Photos：比卡超人妻 , MamiDaily

【誠徵Bloggers！】想分享你的懷孕及育兒日常？請將投稿連同約40字個人簡介和近照一張，電郵到： [email protected]，我們會幫你開設個人專欄，文章經編輯部潤飾後更有機會刊登在FB專頁，快點踴躍投稿吧！