download MamiDaily 親子日常 app
化解孩子開學不安情緒 爸媽要識Do

化解孩子開學不安情緒 爸媽要識Do

教育路
By race.cheng on 22 Aug 2019

長長暑假已經差唔多完~當大家仲諗住捉緊暑假假期玩盡佢時,有一班N班同K1 BB仔就要準備或者已經開學喇!喺入學前,依班小朋友幾乎都冇離開過爸媽,突然要佢哋同屋企人分開,唔多唔少都會有不安,結果又要喺幼稚園門口上演一場痛心分手戲,做爸媽當然會擔心仔女嘅情緒,咁究竟爸媽可以做啲咩呢?今次就請嚟童心苗兒童成長發展中心臨床心理學家陳雅文姑娘同大家「對症下藥」!

小朋友對返學有不安情緒,爸媽要搵出主因解決!陳姑娘解釋,大部分N班同K1小朋友返學會喊、扭計,主要因為分離焦慮。小朋友年紀較細,第一次長時間同主要照顧者分開,仲要到一個陌生環境同一班唔熟悉嘅人一齊,好自然會驚,產生不安情緒。要化解仔女開學不安情緒,陳姑娘建議爸媽可以嘗試以下幾個做法

1)解釋返學係咩一回事

陳姑娘指,仔女對返學抗拒有可能係因為同屋企人分開,或者對返學嘅概念有誤解。有時爸媽可以預先教導小朋友「返學」係咩一回事,唔好用返學去嚇小朋友,例如話:「你返學唔好曳呀,唔係老師會鬧你!」咁樣會令小朋友對返學有負面嘅想法,而且對一啲細膽啲嘅小朋友嚟講,返學要同爸媽分開外,可能會畀人鬧,甚至唔乖嘅話就有唔好嘅事發生!繼而對學校有較負面想法,亦會產生多一種焦慮。如果小朋友覺得返學係好玩,代表大個仔,大個女,係叻叻表現,會對返學有較正面嘅感覺,出現焦慮情況較低。

2)唔洗逼住用言語表達 親子共讀幫到手

對於年紀較細嘅小朋友,可能暫時未識用言語完整表達,當爸媽問多幾問,小朋友會心煩同唔知點講!如果爸媽想關心小朋友學校狀況或想知小朋友對返學嘅感覺時,可以先觀察。陳姑娘鼓勵爸媽,可以喺閱讀有關主題故事書時,引導小朋友分享相類似問題,例如問「你覺得故事入面邊個似你呀?」、「返學好唔開心,所以佢會喊?」、「你好驚個陣會邊到唔舒服呀?」引導小朋友表達情緒,繼而了解事情。

3)將注意力分散

有時候,小朋友對返學本來冇太大恐懼,但當返到學校時見到有小朋友大喊,反而會被嚇親!爸媽可以嘗試主動問小朋友「係咪見到其他小朋友喊,你都唔開心呀?」、「你依家係唔係好驚返學呀?」以表示了解其情緒,同時唔需要刻意避談小朋友唔開心嘅事,亦可以將小朋友注意力分散,問佢一啲開心事,例如:「喺學校有咩開心事發生?」、「今日學咗同玩咩呀?」、「老師點樣呀?」令小朋友知道返學都有其他開心事。

4)預備功夫唔少得

除咗喺小朋友出現焦慮時有應對方法外,陳姑娘都提出一啲可以防患未然嘅方法,例如預先帶小朋友參觀學校,了解學校環境,同時亦鼓勵爸媽可以喺屋企同小朋友玩角色扮演,可以請小朋友扮演老師,爸媽就做學生,令小朋友熟悉學校嘅生活環境。

5)切忌不斷提起 應將分離事輕鬆化

由10月懷胎到見證小朋友可以自己返學,當然係非常興奮嘅事!但爸媽都要注意自己情緒,因為小朋友情緒容易被爸媽帶動。陳姑娘建議指,爸媽應將同小朋友分開嘅過程盡量輕鬆化,切忌誇大「返學」依回事,舉例指,如果爸媽時刻提醒仔女「放學唔好驚呀!」、「一陣返學呢千其千其唔好喊!」或喺分離時,表現得太誇張,話:「媽媽會好掛住你㗎!」都會令小朋友覺得返學係好大件事,甚至誤以為放學係好恐怖。爸媽應盡量淡化返學依回事,可以輕描淡寫啲,清楚交代返只要小朋友放學後,爸媽就會喺邊度等你就可以,例如話:「之前你都返過喇!到放學媽媽就會係到接你㗎喇!」令到整件事普通化,小朋友都會易接受。

6)需要時搵專家協助

由於每位小朋友發展都唔同,係時間適應上都有差異。根據臨床心理學的精神疾病診斷與統計手冊(DSM-5)指出,如果小朋友分離焦慮行為多於四星期,爸媽就要多加留意情況有冇轉壞,或影響小朋友身體,例如出現頭痛、肚痛或痾嘔等,但亦唔洗急於停學或轉校,可先搵專家了解小朋友焦慮原因係咩,對症下藥~

Text:mamiDaily

【隨時隨地接收更多育兒教育資訊】

📱 立即下載 MamiDaily 親子日常APP

🤱🏻 追蹤我們的 Instagram: mamidaily.hk

🔔 訂閱 MamiDaily 親子日常 Youtube頻道