被斥唔教仔 全職媽媽遭家暴欲跳樓

日前，內地一位媽媽哭訴自己16個月大嘅BB只會叫爸爸，唔識叫媽媽，而老公因此責怪起來，更出手打佢。媽媽感到非常委屈，拎住菜刀坐咗喺窗台欲自殺。

據報導指，呢位媽媽生咗BB後，就全職照顧BB。每日除咗要湊BB外，仲要處理家頭細務，非常疲累。媽媽坐喺窗台，半個身跨咗出窗外，激動地表示：「孩子依家16個月大，淨係識叫爸爸，唔識叫媽媽；又未識用飲管，只係識用奶嘴。」媽媽指丈夫因此怪責佢。

Photo from MamiDaily

媽媽又續指，本身囝囝差啲變成早產兒，學講嘢慢啲都係正常，但丈夫唔體諒及理解之餘，仲怪佢冇教囝囝。媽媽認為孩子嘅問題，係父母親雙方都有責任，而丈夫就只怪責佢，因此忍唔住同丈夫嘈起上嚟，結果丈夫拎起iPad打佢，個嘴不停流血。

Photo from MamiDaily

媽媽感到非常委屈，產生輕生嘅念頭，拎住菜刀坐咗喺窗台欲自殺，老公見狀，於是低下頭向老婆道歉。同時向警察表示自己鼻樑都被老婆打腫咗。而媽媽經警察勸喻後，亦從窗外走回家中。

事件引來不少迴響，好多網民都留言指自己嘅小朋友都係好遲先識講嘢，而且都係先叫爸爸，因發音較容易，認為呢種情況並冇問題。另外，亦有網民指當全職媽媽並不容易，加上女士可能會有產後抑鬱問題，大家應該多關注及體諒。

Text：Mami Editorial