【媽媽瞓覺大作戰 扮到瞓當你贏！】

「瞓覺」依個詞語係有咗之後就已經離自己好遠⋯⋯⋯⋯一覺到天光嘅感覺更加好似唔記得係點！前排見到有媽媽分享畀仔仔叫醒嘅笑話，真係欲哭無淚，因為自己都深深感受到，直到依家仔仔4歲，總結到幾個畀阿仔叫醒嘅方法～

1.用腳用手「了你」

BB瞓著，真係盡量盡量（其實係最好）唔好郁到任何嘢！如果郁個個係佢，媽媽們都應該會好緊張，因為佢一郁就知佢可能已經醒！
薯蛋醒咗，唔想郁個陣就係會大字型瞓，但四肢就郁郁下，了下你，有時佢會偷mit我手脾嘅byebye肉，或者狂用腳了我大脾！！！真係人到癲，但又唔可以一嘢fing開，因為有時怕冇心力整親！

2.插鼻哥窿
唔知係唔係我透氣個陣鼻哥窿不斷擴張，所以對於醒咗嘅薯蛋嚟講太得意，所以有時醒咗之後佢就會「捉」住我鼻，繼而插我鼻哥窿！你教我點樣扮瞓好？

3.一嘢坐喺你個肚上面，又上又落一分鐘重復10幾次

相信好多媽媽打開眼見到BB好乖咁眼光光望住天花板後，都會即刻扮瞓，希望BB會自己瞓返，但我想講真係太天真！薯蛋係會爬上我個身，當Cushion咁一嘢坐落去，又上又落，仲會送到幾下大大力用手拍落我個肚到，當打鼓咁！點樣可以仲扮瞓。。。

4.生擒後，用手將你眼皮翻開

聽到都覺痛！試過一次薯蛋仲要係未剪指甲，一嘢刮落隻眼到，好似「爪野」咁，真係即刻醒晒！但有時佢都會細細力mit開眼皮，誓要打開你眼皮，見到你眼珠就會甜甜地笑，真係唔係好笑定好嬲。

其實媽媽都係想瞓多一陣遮～抑或佢冇心整醒我，只係當我係公仔咁玩？

＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝

Text & Photos：薯蛋媽媽

【誠徵Bloggers！】想分享你的懷孕及育兒日常？請將投稿連同約40字個人簡介和近照一張，電郵到：[email protected] 我們會幫你開設個人專欄，文章經編輯部潤飾後更有機會刊登在FB專頁，快點踴躍投稿吧！