【超有共嗚！】孕媽最討厭聽到的6句話

懷孕期間，媽媽心理同生理都會出現好大變化。加上又有好多嘢要顧慮，個人都會變得特別敏感。好易因為身邊嘅人一句說話，而感到低落甚至諗埋一邊。以下幾句說話，相信大部分媽媽都唔想聽到，大家要小心。

Photo from MamiDaily

1. 你個肚咁大／細嘅？

每個媽媽陀BB時嘅胃口都唔一樣，有啲人唔想食嘢，食完又嘔；有啲人食量大增，又吸收得好，一切都係因人而異。媽媽被人胡亂批評，可能亦會開始怪責自己食得太多或太少，擔心BB嘅健康。

2. 食多啲啦！你唔食，BB都要食！

唔係唔想食多啲，但有啲媽媽陀B時經常出現孕吐，加上又易攰，真係冇胃口食。

Photo from MamiDaily

3. 日日都瞓咁多，唔好瞓咁多…

媽媽陀住BB其實真係好攰，夜晚通常都冇覺好瞓。畀BB不停踢肚皮、腰酸背痛、腳抽筋等，瞓下醒下，仲攰過冇瞓，只有孕媽先明白。

4. 呢胎係男定女？

個個見到大肚媽媽，都一定問仔定女。當知道BB性別時又會話：「唔係掛，係仔／女就好啦！、「下胎追返個仔／女啦！」。其實BB嘅性別唔係由媽媽去決定，即使大家不斷畀「意見」，都改變唔到BB嘅性別。

Photo from MamiDaily

5. 要戒口呀，呢啲唔食得！

媽媽一食嘢，身邊啲人就會「專家上身」咁話依樣嗰樣唔食得。其實媽媽自己仲緊張，有啲咩唔食得，醫生都同媽媽講得好清楚，食唔食得就交返畀媽媽自己決定啦。

6. 我陀B嗰陣…

有啲人好鍾意比較、分享個人經驗。但其實媽媽懷孕時，要擔心嘅嘢已經有好多。每個人嘅情況都唔同，如果媽媽有需要會向大家請教，否則就盡量避免多口，為媽媽帶來更大嘅壓力。

Text：Mami Editorial