【驚頭大受腦積水影響 BB堅強受檢查】

星期二菠蘿包見完腦科醫生，醫生建議即刻住醫院做詳細檢查，因為驚頭大係腦積水等等原因影響性命，入院照x光，磁力共震掃瞄，驗尿，抽血。

上到病房無耐就要抽血同種豆，門外等候既菠蘿包媽聽到菠蘿包係入邊喊真係好心痛！幸好遇到好好既護士同姑娘，一邊哄菠蘿包笑一邊抽血&種豆！所以菠蘿包喊左一陣就收左聲了！菠蘿包媽心都痛埋，種豆對我黎講係好痛既事！

休息左無耐就要抱菠蘿包去照x光。

菠蘿包媽要一齊入去幫手按住菠蘿包唔好比佢亂郁，唔知發生咩事既菠蘿包又開始喊，最後媽媽同醫護人員安撫下好彩好合作咁完成！

番到病房諗住可以休息下既時候，醫生突然間走過黎話依加要去多次照x光，因為想照多小小野，結果菠蘿包媽又要抱住菠蘿包去！

來回抱行去咁多次本身腰痛既我仲更加嚴重！照完終於可以番房休息下啦！

幾個鐘後就要食訓教藥準備落去照磁力共震掃瞄，

因為訓左教既關係所以好快就照完！本身派飯時間已經過哂，姑娘知道菠蘿包最緊要食，我地上房前已經幫菠蘿包另外叫左碗粥！

完成一日既行程，未住！菠蘿包訓訓下教突然間護士要菠蘿包抽血，真係好煎熬既一日！因為醫院唔提供床比照顧者，

菠蘿包媽只可以坐椅黎訓，好彩唔係膠椅！但係我都每個鐘就醒一次，仲攪到條頸都痛埋一份！腰又痛頸又痛！

好耐都無睇過日出啦！

醫生黎巡房就話琴日照既x光，磁力共震掃描報告出左，腦部係正常無任何腦積水等等既問題！菠蘿包爸媽都鬆一口氣！醫生話驗血報告只係出左小部份，可以出左院先再約個日子番黎見醫生就可以！

而咩事會大頭呢，就要再做其他檢查先知！發展遲緩個邊醫生安排左排期去做物理治療，又要成日都出入醫院啦！希望菠蘿包咩事都無健健康康！

今次要多謝威爾斯親王醫院既11k兒童病房& x光部& 磁力共震部 所有醫護人員！

佢地一d都唔惡！仲好細心，好好人，仲好傾得！好鐘意小朋友！

～～～～～～～～～～～～～～～～～～～

好多朋友問菠蘿包媽：

菠蘿包咁樣你唔擔心唔緊張既咩？

成日見你都係咁開朗！

其實無擔心緊張就假既！

但唔會過份擔心同緊張，

我地做父母既情緒會影響到菠蘿包，

所以我地選擇堅強樂觀面對！

總有一日會見到曙光！

＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝

Text & Photos：菠蘿包媽

【誠徵Bloggers！】想分享你的懷孕及育兒日常？請將投稿連同約40字個人簡介和近照一張，電郵到： [email protected]，我們會幫你開設個人專欄，文章經編輯部潤飾後更有機會刊登在FB專頁，快點踴躍投稿吧！