婚姻絕對唔係墳墓 6招令老公更愛你

結咗婚後，兩個人嘅關係無論點都會有少少變化。而呢啲微細嘅轉變往往就係最大機會成為鬧交嘅導火線，絕對要避過佢哋～ 除咗唔好無理取鬧外，即睇以下6件簡單小事收服老公，令佢更愛自己！

Photo from Mamidaily

1. 放下強勢
性格強桿嘅人妻千祈唔好做「老虎乸」，要控制好自己嘅情緒，唔好少少事就好激動。心情好嘅時候，對老公溫柔啲～ 令佢以為自己成功感化咗你！事實係你慢慢收服緊佢～（笑）

2. 適當時發脾氣
意見不合時，唔可以一面倒妥協，喺適當嘅時候要強硬啲。適量脾氣絕對可以令對方反省，從而令關係更親密。

Photo from Mamidaily

3. 唔好咄咄逼人
有時好想老公改咗某啲壞習慣，但佢叫極都唔聽！講咗幾次都唔聽嘅話，唯有等一排再提過佢～ 唔好咄咄逼人，畀老公了解你善解人意嘅一面。

4. 笑住等老公放工
辛苦做完一日，知道屋企有人等緊自己，已經歸心似箭。如果一開門見到老婆笑住等緊自己，一定覺得好溫暖，係每日返工嘅動力。

Photo from Mamidaily

5. 尊重對方家人
老公嘅屋企人其實都係自己半個家人，佢哋對自己好嘅話，對佢哋好都係應該嘅。就算佢哋對自己唔好，都唔應該破口大罵，冷處理以示尊重。咁樣唔止顯得自己有家教，亦可以反映畀老公知道理喺邊～

6. 偶然扮靚
有時真係好懶，求其著件衫就出門口。人妻們～ 放假嘅時候，不妨著得靚啲、化返個靚妝，搵返婚前拍拖嘅感覺，老公拖住你出街都開心啲啦！

Photo from Mamidaily

Text：Mami Editorial