良好親子溝通4大攻略

各位爸爸媽媽同小朋友一齊生活嘅時候，不期然會用咗BB話同佢哋講嘢。其實有效嘅親子溝通絕對唔止用牙牙語或者誇張嘅語氣咁簡單～ 即刻睇以下4個小技巧，令溝通更有效啦！

1. 面對面
好多時家長只係向住BB嗰個方向講嘢，就以為BB聽得到。其實爸爸媽媽應該配合小孩嘅高度，嚟達致面對面嘅效果。例如：家長可以蹲喺地上，等小朋友清楚咁見到自己嘅臉部表情； 又或者可以抱起小朋友，先開始同佢講嘢，自己都可以清楚見到小朋友嘅表情。望到對方樣子嘅溝通會比較有效。

Photo from Shutterstock

2. 孩子主導
家長可以先觀察孩子，然後按住佢嘅興趣同佢一齊玩。例如有時喺屋企，BB見到香蕉，想摸吓佢，並表現得好有興趣，家長可以畀佢聞吓香蕉嘅味道，仲可以順便介紹一啲相關嘅詞彙，等佢認識。例如：「香蕉啊！好香！好好味㗎～ 想唔想試吓呢？」

Photo from Shutterstock

3. 多談及眼前事物
家長可以喺小朋友玩緊或者做緊其他嘢嘅時候，配合佢當時做緊嘅動作，邊講邊做，令小朋友更容易明白父母表達嘅意思。例如當一家人等緊?嘅時候，孩子嘗試伸手撳掣，家長可以先問吓佢係咪想撳，然後再試範一次畀佢睇，再睇吓佢做成點。同時亦可以一邊教導同電梯按鈕有關嘅話題，好似燈燈、發光等。

Photo from Shutterstock

4. 多回應、多讚賞
家長可以運用一啲簡單嘅說話回應同讚賞小朋友，從而提高小孩參與嘅興趣。例如同小朋友一齊玩嘅時候，可以一邊指導佢，一邊讚佢做得好。如果小朋友玩玩吓唔耐煩咁嗌，咁試吓將佢嘅諗法講出嚟：「係咪唔想玩呢個喇？咁不如玩其他啊？」一步一步引領小朋友表達佢嘅想法。

Photo from Shutterstock

以上4個技巧睇落好似好容易，不過需要花啲時間去學習，先能夠互相清楚了解對方表達緊啲咩，對親子溝通一定有好大嘅幫助，各位父母不妨試吓啦！

Text：Mami Editorial
Source：衛生署