BB因百日咳引起肺炎併發症死亡 爸爸多番自責

澳洲有出世32日嘅BB因百日咳引起肺炎併發症死亡，BB爸爸多番自責自己，係因為忽視BB咳嗽嚴重性所致。

事源Greg同老婆發現仔仔Riley出現鼻塞同咳嘅徵狀，即使已經到飲奶時間，仔仔都冇想起身嘅念頭，一直好似好攰咁。Greg同老婆就覺得唔正常，所以送仔仔到醫院，當時醫護人員建議可以留院觀察一日，亦相信1至2日就可以出院。

但到第二日，仔仔咳嘅情況愈嚟愈嚴重，醫生指需要再留院觀察，結果到第3日，醫生診斷仔仔係「百日咳」並需要轉送到新生兒重症監護病房，但當時Greg同老婆都未意識到嚴重性，仲笑指醫院子冊子話百日咳會死人太過誇張。
不幸地到仔仔留院到第4日，醫生需要幫Riley進行急救，但到第5日，Riley就因病重離世。

Greg喺仔仔舉行葬禮上，宣讀對仔仔嘅一封信：「當你來臨時，我覺得我充滿力量，我覺得你會同我一齊係食早餐時，幫我喺家姐媽媽手上搶返我嘅栗米片，我覺得因為你，我可以變成超人爸爸，生活好完美⋯⋯一家四口完整，但然後⋯⋯你走了⋯⋯係我嘅無能帶走你。一切都嚟得太突然，每次諗到依5日，我完全接受唔到，一切都係因為我太過掉以輕心。」

Riley離世嘅事令爸爸難以忘記傷痛，甚至每一日都將自己陷入沮喪同憤怒，但Greg知道係時候活過來，要令更多人知道初生BB患病嚴重性，喺社交網站建立專頁，分享更多有關資訊，而係仔仔離世17個月後，Riley再次迎接新生命，囡囡Lucy。

Text：Mami Editorial

Sources：DailyMail