【生完BB24小時母嬰同房 遇到一腳踢更易有情緒】

生完就要24小時母嬰同房，其實有好有唔好，因為餵母乳，BB擺係身邊可以方便餵，又可以對住BB唔洗心掛掛。

但生完真係好攰，需要好好休息，又有傷口，腰又痛，又要係咁抱黎抱去。因為我係2人房，好逼，兩個床位BB床唔可以並排，要將我個囡擺係床尾，咁我想睇佢就好唔方便，好彩隔離床位媽媽好好，俾位我擺返阿囡係床頭。

住左2日出院，有晚溫柔係咁喊，岩岩餵完奶都喊，係咪凍呢？幫佢包好啲衫，順便睇下條片，原來痾左胎糞，墨綠色的，新手媽媽咩都唔識，就㩒鐘睇下有無人幫我，助護入到黎，叫我自己搞掂，幫佢抹同換片，出面有衫自己拎黎換，咁幫佢抹啦，抹乾淨擺落新毛巾時，又痾多督！真係搞唔掂！

又㩒鐘啦，另一個助護入黎，話我成日㩒鐘，我話搞唔掂，佢就話搞唔掂都要搞，再抹乾淨先幫佢著片，就走左啦。嘩！果刻真係好無助，忍唔住喊左出黎，係咁彎住腰抹，已經好痛，仲要遇到咁待遇，點解唔可以幫下人，生完已經好攰好辛苦好痛，仲要冷言冷語！喊住咁幫溫柔整乾淨晒，打電話俾老公呻，佢好嬲，好想即刻過黎。

加上間房冷氣好凍，我又太攰，將BB推出去叫姑娘睇住，定時定候再推入黎叫醒我餵奶。
生完情緒會好唔穩定，仲要遇到呢啲事，真係會崩潰！

＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝

Text：温柔媽
Photos：Shutterstock

【誠徵Bloggers！】想分享你的懷孕及育兒日常？請將投稿連同約40字個人簡介和近照一張，電郵到： [email protected]，我們會幫你開設個人專欄，文章經編輯部潤飾後更有機會刊登在FB專頁，快點踴躍投稿吧！