不幸流產台灣媽媽自責撰文：明明他還在努力，我卻沒有良好的環境給他生長

By race.cheng on 26 Feb 2019

能成功懷孕可能已經唔係易事，懷孕後健康誕下寶寶又唔係必然，當中仍然存在好多變數。有台灣媽媽喺討論區帖文分享自己流產經歷，令唔少人更加覺得新生命誕生真係得來不易。

台灣有媽媽因天生子宮畸形，以及子宮頸閉鎖不全，導致流產。媽媽憶述指，當時發現腹部疼痛劇增，下體流出鮮紅血，腰部亦極度痠痛，所以立即請老公送自己到醫院。去到醫院時，醫生用超音波觀測後就指：「水囊往下，子宮頸閉鎖不全，九成會流產了⋯⋯」當時媽媽指佢一聽到醫生咁講，就瞬間無聲猛掉眼淚，然後望住老公⋯

流產手術唔係即時進行，媽媽抱住沈重嘅心喺待產室等候，當時媽媽不斷自責「我真的不懂⋯為什麼偏偏是我？子宮頸閉鎖不全⋯明明1/500的機率，也能讓我遇到⋯連自己天生子宮畸形也是⋯我真的很沒用⋯保不住自己的孩子⋯明明他還有心跳，明明他還在努力，我卻沒有良好的環境給他生長，兩胎了⋯都是自然流產⋯⋯真的很崩潰」。

雖然老公當時不斷鼓勵太太，話「身體養好寶寶一定會回來找我們！」但媽媽仍然接受唔到現實。最後，BB自行排出體外，醫生就幫媽媽進行胎盤掉出同止血，護士接下BB後，問了媽媽一句：「你想唔想見BB一眼？」當時媽媽十分猶豫，因為驚自己憂鬱同難過，所以痛哭話唔睇，但輾轉一諗，BB可能想見媽媽一面，覺得自己都需要知道，BB曾經努力想做自己嘅寶貝，所以最後都話「好！麻煩你了！」望咗BB一眼⋯

望見四肢健全嘅男寶寶，小小的有兩個手掌大小，但係全身已經係血，當時媽媽就閃起自己為BB準備嘅奶樽、衣服同屋企瞓覺嘅位置⋯⋯責怪感就大增，覺得自己無好好保護BB。

其後唔少網民留言安慰媽媽「寶寶會離開，是因為他到你的身邊的時候才發現，啊！準備好給媽咪的禮物忘記拿了！所以他只是離開一下下」、「身體要好好養好，他們會回來的！」、「沒事沒事，他們忘記約好再一起來啦！」

子宮畸形係指當雙子宮像愛心一樣形狀，而子宮頸閉鎖不全嘅發生機率約1~2%，意思指媽媽嘅子宮無關閉能力，即好似一個無綁緊嘅束口袋，隨時會因為重量太重，導致束口鬆開，所以當喺無子宮收縮狀況下，子宮頸自發性擴張，羊膜囊掉入陰道內，導致破水，繼而令BB產出，情況好多時會喺BB 4-5個月發生，但因為BB仍然太細，所以發生後存活機率低。