美國媽媽血小板異常成功健康產下6胞胎

By race.cheng on 18 Feb 2019

美國媽媽Courtney 已育有3個小朋友，當預備再生第四胎時，竟然懷有6胞胎，由於Courtney 每胎都係得來不易，所以同老公Eric決定生下，懷孕到生產過程都被拍成紀錄片，成功製造一家11口！

Courtney 同老公Eric結婚23年，形容第四胎喜獲6胞胎係「衷心受到祝福」。Courtney指3位哥哥希望有個妹妹，所以計劃再生第4胎，點知換來6胞胎，成家都好興奮。但老公知道能夠健康生下小朋友唔係必然，而且老婆更有凝血障礙，所以反對生產，但喺醫護人員協助後，佢地決定唔放棄。

Courtney知自己獲6胞胎後，心情好矛盾：「帶3個小朋友其實已經好攰，得知再有6個小生命，第一刻係覺得好攰呀！」但回想3個仔仔都好乖，覺得係上帝給予自己機會，應該要珍惜。而且懷孕後，同老公嘅感情升到另一層次「覺得1家11口得來不易，令大家更珍惜對方」而Eric就話湊9個小朋友真係唔易「好采哥哥們會幫手，我每日收工時間就係午夜，我無諗過我已經成功安然度過9個月喇！」

Courtney生下大仔後，被診斷血小板異常，有凝血障礙。對於懷孕媽媽嚟講，會危及BB同媽媽生命。但Courtney仍然希望能夠懷孕，所以經醫生建議後，產前服用藥物幫助預防，減低生產危險，而Courtney 喺第2胎同第3胎試用依嗰方法後，都可以健康生產，但殊不知喺懷孕第四胎時獲6胞胎，最後健康誕下3男3女，平均體重約2-3磅。