長老教B方法唔同 點做先可以有雙贏？

結婚生B後，遇到嘅問題再唔係只係兩個人嘅事，就以點湊BB為例，已經覺得頭痕！除咗兩公婆會討論一大輪外，公公婆婆又要參與，再幸福啲，嫲嫲同爺爺都要畀意見，究竟點先可以取得平衡呢？

知己知彼，百戰百勝，首先要知道長老係屬於邊一類型，唔同性格嘅長老對BB都有唔同影響，溝通方法都唔同。

1.強勢型

有啲長老係仔女同BB面前會呈現強勢嘅姿態，唔相信仔女可以湊掂BB，而且會提出大量個人見解，又唔肯接受別人意見，甚至會以強硬方式迫仔女認同自己，堅持執行。

面對強勢型長老，必須強化自己作為「父母」嘅角色，相信自己嘅理念同能力，而且要避免太依賴依類型長老湊BB，絕對唔可以畀長老威脅BB同自己，以免失去父母嘅威嚴。

2.陽奉陰違型

有時長老對於仔女湊B嘅意見表面會積極支持，但實際湊起上嚟就會有好大出入，依類陽奉陰違型嘅長老喺仔女提出意見嘅時，好容易對號入座，成日出現「此地無銀」嘅情況，不斷質疑仔女係不滿自己湊B嘅方法，整體態度上比較敏感。依類長老可能會成日喺BB面前批評其爸爸媽媽，以及暗中破壞仔女嘅教養規距，並會以各種方法叫小朋友為自己守秘密。

爸爸媽媽要知道，其實長老都只係愛錫BB，並唔係立壞心腸，佢哋往往只係對仔女嘅意見出現懷疑，但又擔心講出嚟會破壞關係，可惜自己又未有能力重新學習；又或者擔心自己嘅問題會增加仔女壓力，繼而出現「先斬後奏」嘅情況。面對依類長老，爸爸媽媽要表現接納同諒解，要先了解點解長老會出現此情況，千萬唔好責備，因為越責備，只會令長老越驚，下次出現小小問題更加唔講。所以與依類型長老溝通時，要清楚說明自己嘅期望同教養方式，最重要係要解釋背後原因。

3.弱勢型

弱勢型嘅長老容易寵壞BB，比較依從仔女同BB嘅意見，將自己嘅意見同感受收埋，即使係仔女要求過高，或者畀BB蝦都唔會講。如果仔女要求合理，BB乖乖聽話，依類型長老會係稱職嘅好幫手；但如果BB特別活潑，或者仔女要求過份，長老會容易出現情緒問題，持續落去有機會影響健康。

由於弱勢型嘅長老只會默默認同仔女，甚少主動提出自己困難，所以仔女要多啲了解長老需要，先衡量長老身體狀況同主動了解長老意見，要以身作則教BB多啲尊敬長輩。

4.理想型

理想型嘅長老大多數有基本知識水平，EQ亦較高，對於問題持開放討論嘅態度，謙虛認同自己都要繼續學習新一代嘅教養知識。理想型嘅長老情緒穩定，對於湊B嘅事好有耐性，懂得尊重仔女嘅教養方針，只會喺仔女提出疑問時，先會給予意見。

如果你嘅長老係理想型，恭喜你呀！你記得要好好珍惜依位長老，可以嘗試多從理想型長老身上學習，放膽畀佢哋照顧BB，令自己可以休息下，由佢哋照顧，分分鐘比你仲緊張呀！

「家有一老，如有一寶」，湊BB絕對唔係只係自己嘅事，仔女要學做爸爸媽媽，都要學點樣一個好仔女，嘗試心平和氣同長老溝通，一定會揾到方法，而且要記住大家初心都係錫BB呀！

Text：Mami Editorial

Photos：Shutterstock