伯伯留下14份聖誕禮物 盼伴2歲小鄰居成長到16歲

每一份聖誕禮物都係送禮物嘅人對自己嘅心意，幾乎所有禮物都有一定嘅意義，英國就有位伯伯為2歲鄰家小妹妹準備咗「一份」好有意義嘅聖誕禮物。

87歲嘅伯伯一直當鄰家嘅小妹妹Cadi係自己嘅孫女，亦希望可以見證「孫女」長大成人，但可惜伯伯敵唔過時間，喺2012年與世長辭。今年伯伯嘅囡囡Jenny幫忙整理遺物時發現，伯伯竟為Cadi預備咗14份聖誕禮物，於是Jenny就代爸爸將依14份禮物送比Cadi。

Cadi嘅父母初頭見到Jenny拎住一大袋嘢畀佢哋嗰陣，以為係一袋要清理嘅垃圾。但聽到Jenny話「依啲係爸爸為Cadie準備嘅嘢」當Cadi媽媽開始一件一件拆開時就發現，原來所有嘢都係鄰家伯伯為自己囡囡準備嘅聖誕禮物，眼淚更開始慢慢流。

其中一份禮物係著名作家Tomi Ungerer嘅兒童故事書《Christmas Eve at the Mellops'》，作家本人得知依件事後主動提出要喺書上簽名送畀Cadi，令整件事更有意義。

Cadi父母記得伯伯曾經同鄰居講過「希望自己可以長命百歲，咁樣就可以見證Cadi長大成人！」但係伯伯知道自己時日無多，所以就係生前為Cadi提前準備好14份聖誕禮物，令Cadi每年都可以收到一份禮物，直到16歲。

Cadi父母憶述同伯伯第一次見面時，伯伯就好熱情咁向佢哋介紹附近所有鄰居，仲同佢哋屋企隻狗成為「好朋友」，Cadi爸爸話：「我要話畀全世界聽，我有一個好善良嘅鄰居。」

雖然伯伯已經離開大家，但佢對身邊人嘅愛就刻骨銘心，希望伯伯喺天堂過住更幸福嘅生活，以另一種方式繼續守護住心愛嘅「孫女」。

Text：Mami Editorial

Sources：Mail Daily

Photos：Owen Williams@Twitter