【扭計BB搞到成個過程超辛苦 媽媽要做好準備】

自從及及出世後，我每日都堅持要痴住佢，我本身好鍾意去旅行，為咗唔想同及及分開，所以決定帶埋佢去！

及及搭過兩次飛機，一次去韓國，一次澳洲。10個有9個人知道我要帶及及去旅行，都同一個反應: 嘩! 好辛苦喎….不過我話你知，係值得嘅! 可能因為及及好少扭計，基本上成個旅程都唔覺得特別辛苦，而且可以同最愛嘅人去旅行其實係一件好幸福嘅事喔!!

帶BB搭飛機有D咩要注意？

可能我個人比較傳統，無論短途機或者長途機，可以的話都會搭D服務比較好嘅航空，舒服安心最緊要~ 尤其帶著BB，航空公司嘅貼心安排好重要。BB坐得舒服，我就自然舒服啦 :)

有BB同行就要去到機場check-in，所以要預早少少去機場。喺飛機上要用嘅BB用品/食品都可以帶少量上機 (請參考航空公司指引)，而泵奶媽就要記謹自備冰袋帶上機，因為空姐們係唔會同你雪奶嘅。BB車可以推到閘口，空姐差唔多時候就會搵你收車，再用膠袋幫你入好。有BB嘅好處係可以優先上機，慢慢settle好，唔怕到時會阻到其他乘客。

飛機起飛/降落時，記得準備奶咀俾BB，或者俾奶BB食都可以，減低BB耳鳴嘅機會。空姐們會俾個膠袋你，入面會有幼兒餐，通常都係一樽樽嘅果蓉/蔬菜蓉，另外仲會有尿片同迷你裝嘅護膚膏，好貼心架~ 不過片片建議自備，因為未必啱用。

起飛後，空姐們會預備BB籃，記得BB籃要喺訂票後預先預留，同埋睇番BB籃係咪適合你嘅BB用，一般都係12KG以下嘅BB，但如果BB身形好長/好大隻就可能訓得唔太舒服。好彩及及兩次旅行都夠訓，同肯訓BB籃，我就輕鬆得多 ;)

可以的話，揀夜晚機會比較好，上機之前俾定奶BB食，一上機就哄佢訓覺，咁就唔駛擔心會騷擾到其他乘客啦~~