同年紀識轉身 我bb仲未識轉身係咪發展有問題

一個小生命誕生，爸爸媽媽當然期待BB每一個躍進，翻身、坐、爬、企、行都代表住BB步入唔同成長階段。

亦理所當然地，每個爸爸媽媽都希望自己嘅小朋友聰穎過人、鶴立雞群，所以好自然咁將自己嘅小朋友同其他差唔多年紀嘅小朋友作比較。

而初為人父人母嘅，當然最期待BB第一個轉捩點—翻身。

當見到同月齡嘅小朋友已經成功翻身，而自己嘅BB仲係腳仔郁郁唔肯翻身，或者要人輔助下先翻到身，就會變到好心急。但十隻手指有長短，每個BB嘅發展潛力、速度唔同。

與其覺得BB發展比人慢，不如睇下點樣可以幫助BB學翻身。爸爸媽媽可以因應BB唔同想翻身嘅信號而配合同輔助BB。

1.如果BB平訓時成日踢起腳

其實BB呢個動作已經話左比你聽，佢係想翻身架。

但因為佢仲未控制到腰部同pat pat，所以媽媽可以輕輕推BB pat pat一下，等佢知道係差個pat pat就可以轉到身架喇。

2.如果BB識得側身訓

其實BB已經距離學識轉身不遠了。因為如果BB側身訓，只係差一個膊頭位就可以轉身。

所以媽媽可以拎玩具吸引下BB，引導BB轉身。起初BB會因為一隻手仔壓住左而喊，媽媽可以幫BB抽返隻手出黎。

3.如果BB冇以上嘅動作

媽媽亦可以多啲同BB進行tummy time，比BB多啲趴係度，再用玩具吸引下佢，等BB習慣趴係度。咁BB就可能會有意慾自己轉身。

除左用玩具，媽媽亦可以搵一個大少少嘅地方，例如遊戲墊，放BB係隔離趴住，然後媽媽自己係隔離示範轉身。當BB望到幾次之後，就會嘗試跟住你嘅動作去轉身。

又或者可以比BB趴係自己心口，然後通過自己轉身，帶動埋BB一齊轉。可以令佢嘗試下轉身嘅感覺，都會增加BB想轉身嘅意慾架。

Text：Mami Editorial