新手父母抑鬱症 最驚嘅4件事

望住可愛嘅初生BB，爸爸媽媽當然有無窮嘅喜悅，不過心底裡都有啲不安，既要適應父母呢個全新嘅身份，加上湊BB生活有好多未知之數，其實新手父母最驚以下4件事。

1. 湊唔掂BB

新手父母對住BB咩都係第一次，即使之前聽過講座、上過湊BB嘅工作坊，到自己真正照顧BB時總會有啲手足無措。面對每一日嘅挑戰，餵奶、掃風、換片、沖涼⋯⋯仲有好多突如其來嘅事，好似BB病咗，父母都怕自己湊唔掂。

2. 體力應付唔到

湊BB好攰又要捱眼瞓，爸爸媽媽都怕自己頂唔順，半夜要起身餵奶，每日斷斷續續瞓得幾個鐘。如果第二日要返工，唔夠精神又驚返工瞌眼瞓，影響工作表現。

3. 經濟能力不足

養一個BB開支好大，新手爸媽要苦惱家庭收入係咪足夠應付。另一方面，又怕工作唔穩定，出現變動而影響收入，為咗BB更加唔可以隨意裸辭。

4.  忽略另一半

自從有咗BB之後，兩夫妻嘅焦點自然喺BB身上，大家日常忙住湊BB，話題亦離唔開BB，甚至會因為BB嘅事而嗌交。由以前二人世界到依家三口之家，父母都怕自己只掛住關心BB而忽略咗另一半，無形中影響關係。

Text: Mami Editorial