媽媽生完冇晒記性 3件孕傻小事令媽媽懷疑自己能力

明明生BB前記性好、轉數快，係一個精明女人仔；點知生完BB之後就180度反轉，變成好似金魚一樣得3秒記憶！落奶粉成日唔記得落咗幾多匙、提自己要做嘅嘢下一刻就唔記得⋯⋯令媽媽們不禁慨嘆，點解自己會變得咁冇用㗎！下面呢3件「孕傻」小事，你哋又有冇試過呢？

1.漏低嘢

出街遇著BB要飲奶嗰陣，總要拎好多嘢出嚟，奶樽、水樽、熱水壺、粉奶格⋯⋯急急忙忙咁一路沖奶一路安撫餓到喊嘅BB，搞完一大輪，終於BB飲飽奶、變安靜可以移動去下一個地方，偏偏去到另一個地方先發現自己漏低咗嘢，要返轉頭拎返！（漏低奶樽、水壺事小，但如果漏低電話冇晒BB啲珍貴相，真係喊出嚟都似！）

2.唔記得重要日子

有時有啲重要日子，好似BB出生日期、屋企人生日、結婚記念日等等明明已經記到實一實，但當忽然畀人問一問，唔知點解個腦會即時空白咗！通通唔記得晒！

3.撈亂出世紙同結婚證書

BB第一次睇醫生通常都需要帶埋BB嘅出世紙做登記，不過如果BB喺半夜發高燒，媽媽又急又慌嘅之下，有機會錯手拎咗結婚證書當係BB出世紙咁衝去睇急症⋯⋯結果去到登記時，同工作人員你眼望我眼果下，真係會瘀到想搵窿捐呀！不過好彩喺呢啲緊急情況，急症室都會先收症，然後叫你後補出世紙。

Text: Mami Editorial