【超人婆婆好福氣 媽媽可以放心去休息】

西瓜婆婆有3個仔3個女，而我就係最尾個個。未過60嘅媽咪，好多人都話佢好福氣，除左仔女，孫都已經有7個半！完全可以用兒孫滿堂黎形容佢。

西瓜妹係佢暫時最尾個個孫，記得7月3日個日，我陣痛、生仔同鏠針都無喊。到推出產房，老公比電話我聽個陣，聽到媽咪把聲，成個人好似鬆一口氣，大喊出黎，果然阿媽係最明白自己 。

生之前，媽咪話過應該唔黎探我，因為太遠同埋佢要開鋪。點知第二日，全家出動咁濟， 2個鐘探訪時間，10條友輪流入黎睇bb，好誇張！

出院有媽咪同姐夫揸車接我，我係佢地黎之前，發生左個小插曲，西瓜妹4個鐘有3個鐘要啜奶奶，精神加肉體上嘅折磨，喺媽咪入病房接我地個陣，簡直係打救左我，原來醫院凍，所以西瓜妹一直扭計，媽咪幫佢帶唒衫，抱實出院，訓左2個鐘。

如果論凑bb，佢絕對係陪月級別，bb扭肚餓定扭眼訓都知，沖涼超熟手，連肚仔有風都係用手指輕拍2下就知係咪，太厲害了。

當然超人都有缺點，媽咪係煮食方面，佢識煮好多美食，但坐月佢只會比我食3樣野，薑炒瘦肉，薑炒菜心瘦肉，薑炒蛋⋯⋯係好味，但我食到好厭。

媽咪，好多謝你！我知道你凑西瓜妹，有時休息唔夠，多得你夜晚接我更，同佢一齊訓覺。我一定會叫西瓜妹錫婆婆！因爲23年前，佢用盡全力生左我，再自己凑大我。媽咪 I love you！上年凑完一個，今年又一個！下年又黎多個啦！

＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝

Text & Photos：西瓜媽媽

【誠徵Bloggers！】想分享你的懷孕及育兒日常？請將投稿連同約40字個人簡介和近照一張，電郵到： [email protected]，我們會幫你開設個人專欄，文章經編輯部潤飾後更有機會刊登在FB專頁，快點踴躍投稿吧！