新手父母易產後抑鬱 3句說話為愛侶打打氣

BB順利出世之後，媽媽開始忙於餵奶，而爸爸就要忙著搬運物資往來屋企同醫院，雙方都要一齊踏入冇覺好瞓嘅全新時期。加上湊初生BB仲有好多唔識同唔熟嘅地方，每次嘅手足無措都會增加新手父母嘅壓力。偏偏喺呢個時候，爸爸媽媽都會將所有注意力放喺BB身上，除咗忽略身邊最重要嘅戰友感受，而且會認定對方重視BB多過自己。其實只要大家願意每日同對方講以下3句說話，足以令大家嘅愛更勝以前，齊齊戰勝「產後抑鬱」！

1.辛苦你

產後媽媽身體未復原、每隔2、3個鐘要抱BB餵奶掃風、半夜要隨時起身安撫哭喊嘅BB、追奶壓力、乳房脹痛、雙手因長期抱B／擠奶而變得酸麻無力⋯⋯種種都令媽媽心力交瘁；而爸爸放完侍產假要復工之後，放工要幫手做家務、照顧BB、半夜起身幫手安撫BB⋯⋯同樣苦不堪言。或者雙方喺呢個時候，眼中只睇到自己嘅苦況，而忽略對方亦同樣辛勞，不妨同對方講一聲：「辛苦你。」畀對方知道你係明白佢嘅付出。

2.交畀我

當一切漸上軌道，好多時照顧BB嘅工作都自自然然分咗工，如媽媽餵奶，爸爸洗奶樽。其實如果當日體力許可，不妨主動提出幫對方做某D工作，講一聲：「交畀我！」，畀對方休息一陣，相信另一半一定會非常感動，亦會喺回復精神後幫手做埋剩下嘅工作，做對並肩作戰嘅好戰友。

3.我愛你

即使已經成為一家人，亦要時刻為愛情保鮮，每晚同對方講一聲：「我愛你。」已經足夠為對方注入一枝強心針，令對方繼續為呢段愛情而努力，亦會好好孕育大家嘅愛情結晶品！

Text: Mami Editorial