【產後8小時過後 媽媽們都唔會忘記嘅第一次】

7月4日，係我第一次落床自己親自照顧西瓜妹既第一日，仲記得產後8小時過後，要自己去一次洗手間，下面傷口既痛無時無刻都提醒住我：無錯阿！你無發夢，你琴晚真係生左個女！

換走件代表自己懷孕中既粉紅病人衫，著番件格仔病人衫就開始自己同個女單對單相處。

第一次學換尿片

喺學換尿片個陣，終於知道胎糞係點，好綠好杰好難抹，抹完要幫bb搽凡士林，等下轉再痾，都唔怕痴實，第一次拎起佢雙腳，真係好驚整痛佢。

第一次學埋身餵奶

埋身餵奶係幾個媽媽一齊去客廳學習，餵奶要擺好個陣，枕頭放係椅背，之後另一個抱枕放大脾，然後一手將bb打側身，固定頸部，然後就開始餵，會有姑娘幫手望下姿勢，bb嘴型岩唔岩，餵既時間45-60分鐘，每2個鐘去客廳餵一次，到你姿勢岩(大約去3次左右) 之後就自己係床餵。

第一次洗臍帶

洗臍帶個陣真係勁驚整痛佢，本身醫院話7-14日先甩，好彩第六日已經甩左。

第一次掃風

掃風嘅時候，就係要托住下巴位，每次掃完會好有成功感！

第一次自動2個鐘自己醒一次

生咗BB之後，自動每2個鐘醒一次，就係起第睇下bb有無紥醒喊醒，對於平時一日訓好多個鐘既我黎講簡直崩潰！

第一次哄好自己個b

大家都知道喊聲係會傳染，個3日隔離床d bb勁扭，最後一個bb整醒左三個bb！大家要鬥快哄好自己個B。

第一次面對bb扭大計

出院個日，係我最崩潰既一日，因為佢學識左一喊我就會自動埋身餵，我個日5個鐘斷斷續續都餵左4個鐘， 之後不停扭抱假喊，搞到蓮妹2邊受傷，嗱嗱聲叫阿媽黎接我走同救我。
-

開始穩定落黎，希望做到一個富媽媽！亦希望bb乖乖！

＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝

Text & Photos：西瓜媽媽

【誠徵Bloggers！】想分享你的懷孕及育兒日常？請將投稿連同約40字個人簡介和近照一張，電郵到： [email protected]，我們會幫你開設個人專欄，文章經編輯部潤飾後更有機會刊登在FB專頁，快點踴躍投稿吧！