【親子旅行好去處 有得玩又有得食 介紹粉紅古堡波波池親子餐廳】

認識小JM家嘅朋友仔都知道我地好喜歡遊台中，除咗因為有朋友喺台中之外，其實我地一家都好喜歡台灣嘅風土人情及各大小景點、美食等。

年頭趁著小JM生日我地亦帶同長輩一同出遊台中，台中其實亦有好多大大小小嘅Playhouse，

今次我地就帶咗小JM去一間位於台中市西屯區內，充滿粉紅色彩嘅Playhouse - 貝兒絲樂園 (魔法世界主題館)

貝兒絲樂園 (台中。魔法世界主題館)係2017年中先開幕，所以亦算係好新淨。

係出發之前小JM媽亦曾經透過FB查詢時段及收費，

仲意外發現原來我地外國旅客去玩仲有獨家優惠包套，更加抵玩！

貝兒絲樂園除咗有得玩之外場內亦設有餐廳，玩到攰時亦可以食吓嘢抖下，抖完先再玩都仲得！

外國旅客優惠方案唔單止有得玩，仲有包埋大人同小朋友嘅食物同飲品添架！

兩大一小包套內容:

1x 肉醬義大利麵

1x 磨菇里肌飯

1x 雞薯拼盤

1x 兒童肉醬義大利麵

1x 兒童果汁

紅茶/ 綠茶/ 咖啡 (3選2)

好啦，食飽飽又係時候出發去玩啦！

出發之前就緊係要睇下個場內地圖，唔係一陣容咩易迷路架。

（圖片轉載自官網）

溫馨提示：

1.)　基於個人衛生問題，記得要著襪喔。

2.)　有唔舒服就唔好去玩，要多啲休息。

3.)　要保持場內整潔。

一進場小JM已經被一個粉紅至極嘅撲克牌古堡波波池所吸引。

我同爸爸見到都覺得好正，所以就一齊衝晒入去玩。

撲克牌古堡波波池內設有多個不同區域，不單止有滑梯，仲有滿滿嘅粉紅波波。

波波池嘅牆上更設置咗一系列水管運球遊戲添。

唔單止咁，場內仲設有一個障礙物區域，足以加速小朋友放電。

同時又可以訓練一下小朋友嘅大小肌肉同體能，仲好考小朋友嘅耐性同膽量添架。

除咗障礙物區域之外，喺撲克牌古堡內仲滿佈重重機關，有車軚陣、繩網等，想要玩滑梯都唔係易事呀。

玩完波波池想玩啲靜態少少嘅亦得！

露露魔法屋其實係一間夢幻嘅魔法樹屋。

雖然屋仔細細，但幾個小朋友坐係入面傾計都一樣得。而最特別係樹屋內竟然有手風琴呀！

係樹屋另一邊出口出來之後就會見到秘境特快車！

原來呢度唔單止有遊樂設施，就連電玩都有添！

電玩區旁邊就剛好有一間魔鏡變裝屋，可以俾大小朋友一齊變裝影相留念。

而連接住魔鏡變裝屋嘅就會係魔藥調配室！

魔藥調配室之內有兩個注滿水嘅大鍋，鍋入面有各種不同嘅小昆蟲及小動物。

如果你都想調配屬於自己嘅魔法藥的話，你就要記得著返件保護衣先啦！

如果小朋友喜歡玩角色扮演遊戲就可以去貝兒料理店、大胃麵包屋、雜貨市集及危哆修車廠啦！

呢幾個區都分別提供咗不同嘅玩樂設施俾小朋友去扮演日常生活中嘅人與事，有助加強小朋友之間嘅溝通及合作性。

雜貨市集：設有手推車及各式不同嘅蔬果，小朋友完成購物要到收銀機台付款喔。

收銀機真係可以掃瞄到標籤架，仲可以計數埋單！

貝兒料理店：小JM爸很耐心陪小JM玩煮飯仔，無他嘅，爸爸想小JM大個小小就一齊煮嘢食喎。

料理店內設有多款不同嘅木製小家電及用具，上至茶杯碗碟，下至焗爐攪拌機都一應俱全。

大胃麵包屋：可以俾小朋友扮演成店員及顧客，從而增加小朋友對日常嘅認知。

危哆修車廠 ：以為男仔先鍾意整車? 小JM話你知佢其實都好鍾意砌車架!

車廠入面有各樣工具可以俾小朋友體驗維修嘅樂趣。

唔知除咗車同飛機仲會整到咩呢？

場內除咗有秘境特快車呢款機動遊戲之外，其實仲有飆速金龜車！

場內有數款不同嘅復古金龜車，小朋友可以驅車係魔法書房嘅賽車跑道飛馳真係夠晒難忘。

如果想靜態嘅其實都仲有一個選擇，可以帶小朋友去益智玩具區度輕鬆放電，有得玩又有得睇圖書。

唔單止咁，場內仲有小型迷宮(威力奇異森林)、親子興趣小組等，

真係可以令大人同小朋友樂上一整天架。

而貝兒絲樂園係台灣嘅其他地區亦有好多唔同嘅主題樂園，

最新係六月尾會有 貝兒絲樂園 (桃園) 英倫小鎮主題館 開幕添架!

來緊會去台灣親子遊嘅你地唔好錯過啦!

即刻去片睇下有幾好玩啦!

貝兒絲樂園 (台中。魔法世界主題館)

營業時間：10AM ~ 8PM

電話：+886 (04) 2251-2859

地址：台中市西屯區市政路480號3樓(禮客百貨)

交通資訊：

客運/公車

1.第六分局

統聯75、台中客運60、69往市政路方向步行約1分鐘。

2.河南市市政路口

台中客運27，往惠來路方向步行約5分鐘。

開車

1.中山高（國道1號）

中港交流道右轉環中路，

再左轉市政路於市政路惠來路口迴轉。

2.中彰快速道路

市政路出口下交流道，市政路惠來路口迴轉。

3.中投公路

文心路往北屯路方向，左轉市政路。

＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝

Text & Photos : 傑。斯與晴

【誠徵Bloggers！】想分享你的懷孕及育兒日常？請將投稿連同約40字個人簡介和近照一張，電郵到： [email protected]，我們會幫你開設個人專欄，文章經編輯部潤飾後更有機會刊登在FB專頁，快點踴躍投稿吧！